14-20 qazan aralyǵynda Qyzylordada ulttyq sport túrlerinen IV respýblıkalyq festıval ótedi
Oǵan Astana, Almaty qalalary men barlyq oblystardan 2000-ǵa jýyq sportshy qatysady.
Tórt jylda bir márte uıymdastyrylatyn festıval baǵdarlama boıynsha sporttyń 13 túrinen alaman báıge 25 shaqyrym, báıge 16 shaqyrym, qunan báıge 7 shaqyrym, kókpar, aýdaryspaq, teńge ilý, qyz qýý, toǵyzqumalaq, asyq atý, qazaq kúresi, qusbegilik, jamby atý, jekpe-jekten ótedi.
Sondaı-aq, «Sándi kıiz úıler» baıqaýy men «Keremet sáıgúlik» sulý attar baıqaýy da uıymdastyrylady.
Aıta keteıik, Bul saıys 1999 jyly Astana qalasynda alǵash ret jalaýyn kótergen edi. Al Qyzylorda oblysy - tórtinshi bolyp qabyldaýda. Negizi atalmysh shara oblysta birinshi márte uıymdastyrylýda.
Festıvaldiń maqsaty - QR Prezıdenti N.Á.Nazarbaevtyń «Nurly jol - bolashaqqa bastar jol» Qazaqstan halqyna Joldaýyn júzege asyrý, elimizde ulttyq sportty damytý, salaýatty ómir saltyn nasıhattaý, ulttyq sportqa degen qyzyǵýshylyqty arttyryp, jastardy otansúıgishtikke, patrıotızmge tárbıeleý, halyqtar arasynda dostyq pen tatýlyqty nyǵaıtý jáne ulttyq sport túrlerin damytýdaǵy eń myqty óńirdi anyqtaý.
Uıymdastyrýshylar: QR Mádenıet jáne sport mınıstrligi, Qyzylorda oblysynyń ákimdigi, QR ulttyq sport túrleri Qaýymdastyǵy, Qazaqstan halqy Assambleıasy.
Festıval 4 kezeńde ótkiziledi. Birinshi kezeńi - aýyldyq okrýgterdegi jarystar 2015 jyldyń 1-25 mamyr aralyǵynda, ekinshi kezeńi - aýdandyq jarystar 1-25 maýsym aralyǵynda, úshinshi kezeńi - oblystyq irikteý jarystary shilde - tamyz aılary aralyǵynda ótkizilse, tórtinshi kezeńi - aqtyq jarystar Qyzylorda qalasynda bolady.
Oıyndar 14 qazan kúni bastalady. Festıvaldiń saltanatty ashylýy 16 qazan kúni saǵat 17.00-de ortalyq stadıonda bolady.
