14, 16 jáne 18 mamyr kúnderi «El Arna» telearnasy «Eýrovıdenıe - 2013» baıqaýynyń tikeleı efırdegi kórsetilimin usynady
ASTANA. 14 mamyr. QazAqparat - «El Arna» telearnasy Qazaqstan aýmaǵynda ekslıýzıvti «Eýrovıdenıe - 2013» baıqaýynyń tikeleı efırdegi kórsetilimin 14, 16 jáne 18 mamyr kúnderi usynady.
Ol jaıynda «Habar» agenttiginiń baspasóz qyzmeti habarlady.
Shved qalasy Malmede «Eýrovıdenıe-2013» 58-mýzykalyq baıqaýy bastaldy. Bıylǵy jyly bul baıqaýǵa 39 elden ártister qatyspaq.
Dástúr boıynsha «El Arna» telearnasy bul orasan mýzykalyq shoýdy tikeleı efırde 14, 16 jáne 18 mamyr kúnderi Astana ýaqyty boıynsha saǵat 01.00-de kórsetedi.
«Eýrovıdenıe» baıqaýyna qazaqstandyqtarǵa mýzykalyq saraptamashylar Roman Raıfeld pen Qaldybek Jaısańbaı túsindirme berip otyrady.
Álemdik basylymdar bıylǵy «Eýrovıdenıe» baıqaýynyń qarapaıymdyǵyn, daıyndyq qarqyny burynǵydaı qulashyn keńge jaımaǵanyn atap ta úlgerdi. Alaıda bul baıqaýǵa degen qyzyǵýshylyqty azaıta qoıǵan joq, baıqaý burynǵysynsha áli kúnge deıin 500 mln.-nan astam adamnyń basyn qosatyn, álemdegi eń áıgili mádenı shara bolyp otyr.
Bul án baıqaýynyń sımvoly elderdiń alýan túrliligin beıneleıtin túrli-tústi kóbelek boldy, al urany - We Are One (Biz birtutaspyz).
«Eýrovıdenıe-2013» baıqaýynyń ánuranyn jazǵandar AVVA tobynyń qatysýshylary - 1974 jylǵy baıqaýdyń jeńimpazdary Born Ýlveýs pen Bennı Anderson. Dástúr boıynsha úsh júrgizýshiniń ornyna Shvetsııa iri kólemdegi mýzykalyq baıqaýdy bir ǵana adamǵa - shved ázilqoıy Petra Medege senýge táýekel jasap otyr.
Kóptegen qazaqstandyqtar reseılik Dına Garıpovaǵa jankúıer bolady. Baıqaýǵa qatysýshylardyń aldyńǵy qatarynda qazirdiń ózinde Danııadan kelgen Emelı de Fores tur, ol bıyl Melodi Grand Prix baıqaýynyń danııalyq nusqasynda jeńimpaz atanǵan.
«Eýrovıdenıe-2013» baıqaýy kórsetiliminiń kestesimen sizder «El Arna» telearnasynyń resmı saıtynan tanysa alasyzdar www.elarna.kz
