13,9 mlrd jymqyrǵan: Abylaı Myrzahmetov 5 jylǵa bas bostandyǵynan aıyryldy

ASTANA. KAZINFORM - Astana qalasynyń qylmystyq ister jónindegi mamandandyrylǵan aýdanaralyq sotynda asa iri mólsherde alaıaqtyq jasaǵany úshin Abylaı Myrzahmetovke qatysty qylmystyq is qaraldy. 

Sotta anyqtalǵandaı, A.Myrzahmetov 2022 jylǵy mamyr aıynan qazanǵa deıin B.-ǵa aqshalaı syıaqy úshin memlekettik jáne quqyq qorǵaý organdarynyń joǵary laýazymdy tulǵalary arqyly aǵasy B.-ny qamaýdan bosatý jáne oǵan qatysty sotqa deıingi is júrgizýdi toqtatý máselesin sheshýge múmkindiginiń bar ekendigin aıta otyryp, jańylystyryp, aldaý jáne senimdi teris paıdalaný arqyly, alaıaqtyq jasaý jolymen formaldy túrde qaryz sharttaryn resimdeı otyryp, B.-nyń asa iri mólsherde 13,9 mlrd. teńge somasynda aqshalaı qarajatyn jymqyrǵan.

Prokýror aıyptaýdy qoldady.

Sottalýshy kinásin moıyndap, ádil jaza taǵaıyndaýdy, qorǵaýshylar is boıynsha is júrgizýdi toqtatýdy surady.

Sot QK-niń 190-baby 4-bóliginiń 2) tarmaǵy boıynsha kúdiktini kináli dep tapty. Bul baptyń sanktsııasy 5 jyldan 10 jylǵa deıingi merzimge bas bostandyǵynan aıyrý túrindegi negizgi jazany kózdeıdi.

Sot sottalýshynyń kinásin moıyndaýyn, shyn júrekten ókinýin, ózi jasaǵan qylmysty tergeýge jáne qylmys jasaý nátıjesinde alynǵan múlikti izdestirýge járdemdesýin, kámeletke tolmaǵan balasynyń bolýyn jaýapkershilik pen jazany jeńildetetin mán-jaılar retinde tanydy.

Qylmystyq jaýaptylyq pen jazany aýyrlatatyn mán-jaılar anyqtalǵan joq.

A.Myrzahmetovtiń kinási sottalýshynyń óz kinásin moıyndaýymen, kýálardyń aıǵaqtarymen, qaryz sharttarymen jáne qylmystyq istiń basqa da materıaldarymen dáleldendi.

Sot úkimimen A.Myrzahmetov asa iri mólsherde alaıaqtyq jasaǵany úshin kináli dep tanylyp, jergilikti ózin-ózi basqarý organdarynda jáne kvazımemlekettik sektor sýbektilerinde 10 jyl merzimge qyzmet atqarý quqyǵynan aıyryla otyryp, memleket kirisine qylmystyq jolmen alynǵan 5,8 mlrd. teńge somasynda aqsha qarajaty tárkilenip, 5 jylǵa bas bostandyǵynan aıyryldy.

Sot QK-niń 49-babynyń 2-bóligi negizinde QR Prezıdentine A.Myrzahmetovti «Qurmet» jáne 3-dárejeli «Barys» ordeni memlekettik nagradalarynan aıyrý týraly usynys engizdi.

A.Myrzahmetovtiń múlkine salynǵan tyıym saqtaldy.

Sot úkimi zańdy kúshine engen joq.

Aıta keteıik, 2023 jyly 10 mamyrda «Atameken» Ulttyq kásipkerler palatasy basqarmasynyń eks-tóraǵasy Abylaı Myrzahmetov ustaldy.

Sol jyly 29 jeltoqsanda Astana qalasynyń qylmystyq ister jónindegi mamandandyrylǵan aýdanaralyq soty «Atameken» UKP burynǵy basshysy Abylaı Myrzahmetov isi sotqa túskenin habarlady.

2024 jyly 22 qańtarda Atamekenniń burynǵy basshysy Abylaı Myrzahmetovtiń soty jabyq ótetini habarlandy.