138 myń stýdent óndiriste tájirıbe jınaıdy: 11,7 myń kásiporyn kolledjdermen jumys isteıdi
ASTANA. KAZINFORM – Qazaqstanda 138,2 myń kolledj stýdenti dýaldy oqytý júıesimen qamtylǵan. Olar teorııalyq bilimin óndiriste tájirıbemen ushtastyryp júr. Bul týraly Oqý-aǵartý mınıstri Juldyz Súleımenova Úkimet otyrysynda aıtty.
Onyń aıtýynsha, sońǵy úsh jylda dýaldy oqytýmen qamtylǵan stýdentter sany 108 myńnan 138,2 myńǵa deıin ósip, 7,8 paıyzǵa artty.
– Búgingi kúni 552 kolledj 11 700 kásiporynmen birlesip, dýaldy oqytýdy júrgizýde. Óńirler boıynsha joǵary kórsetkishter Jambyl oblysynda (51,5%), Almaty qalasynda (39,7%), Almaty oblysy (39,2%), Qostanaı oblysy (37,8%) jáne Astana qalasynda (37,1%) baıqalady, – dedi J. Súleımenova.
Al tómen kórsetkishter – Abaı (21,2%), Atyraý (21,9%), Batys Qazaqstan (25,0%), Ulytaý (26,0%), Soltústik Qazaqstan oblystarynda (28,8%).
Sapaly kadrlar daıarlaý úshin Qostanaı oblysynda Germanııanyń bilim berý ortalyǵymen birlesken Halyqaralyq dýaldy oqytý ortalyǵy, Qyzylorda oblysynda eń alǵash zamanaýı Quzyrettilik ortalyǵy ashylǵan.
Sondaı-aq Qazaqstanda 4 126 kásiporyn 613 kolledjben áriptestik ornatyp, bolashaq mamandardy daıarlaýǵa tikeleı qatysyp jatyr. Kompanııalar oqý oryndarynyń materıaldyq-tehnıkalyq bazasyn jańartýǵa, óndiristen mamandar tartýǵa, stýdentterdiń praktıkadan ótýine jáne túlekterdi jumysqa ornalastyrýǵa atsalysady.
Іri seriktester qatarynda «SaryArqaAvtoprom», «Kazhrom», ERG, «Kaztsınk», «Qazaqmys», Eýrazııalyq energetıkalyq korporatsııa, «Tehno-Nıkol – Kazahstan», Altyntau Kokshetau bar.
Buǵan deıin J. Súleımenova Qazaqstan kolledjderinen 32 mamandyq alynyp tastalýy múmkin ekenin aıtqan edi.
Olardyń ornyna 20 jańa mamandyq paıda bolady.
Qazaqstannyń 11 óńirinde jańa zamanaýı kolledjder salynady.
Sondaı-aq kolledj oqytýshylary shetelde biliktiligin arttyrady.
