136 myń jol belgisi tekserildi: Qazaqstanda 97% talapqa saı ekeni anyqtaldy
ASTANA. KAZINFORM — Qazaqstannyń respýblıkalyq joldarynda ornatylǵan 136 myńnan astam jol belgileriniń 97%-y normatıvtik talaptarǵa saı ekeni anyqtaldy. Júrgizilgen tekserý barysynda keıbir kemshilikter tirkelip, olardy joıý úshin jaýapty mekemelerge tıisti sharalar qabyldaý tapsyryldy. Bul týraly Kólik mınıstrligi málim etti.
Qazaqstannyń respýblıkalyq mańyzy bar avtojoldarynda 136 myńnan astam jol belgisi ornatylǵanyn bilesiz be? Olar kún saıyn júrgizýshilerge baǵyt-baǵdar berip, qaýipti ýchaskeler týraly eskertip, joldaǵy qozǵalys qaýipsizdigin qamtamasyz etýge kómektesedi. Jol ınfraqurylymynyń qaýipsiz ári zamanaýı talaptarǵa saı bolýy úshin jol belgileriniń jaı-kúıi turaqty túrde baqylaýdan ótkizilip otyrady.
Osy baǵyttaǵy júıeli jumystar aıasynda Jol aktıvteri sapasynyń ulttyq ortalyǵy respýblıkalyq mańyzy bar avtomobıl joldaryndaǵy jol belgilerine aýqymdy tekserý júrgizdi.
— Teskerý barysynda mamandar respýblıkalyq avtomobıl joldarynyń búkil jelisin qamtı otyryp, 136 myńnan astam jol belgisin tekserdi. Nátıjesinde jol belgileriniń shamamen 97%-y qoldanystaǵy normatıvtik talaptarǵa sáıkes keletini anyqtaldy, — delingen habarlamada.
Sonymen qatar profılaktıkalyq baqylaý aıasynda nazar aýdarýdy qajet etetin shamamen 4,3 myń jaǵdaı anyqtaldy. Eskertýlerdiń basym bóligi jekelegen jol belgileriniń tabıǵı tozýyna jáne tehnıkalyq jaı-kúıine baılanysty. Bul — kólik qozǵalysynyń qarqyndylyǵy men aýa raıy jaǵdaılarynyń áserinen týyndaıtyn qalypty jaǵdaı.
— Anyqtalǵan kemshilikter qatarynda keıbir jol belgileriniń búlinýi men tozýy, ornatý talaptarynan aýytqýlar, sondaı-aq aqparattyq qurylymdardyń kórinýi men oqylýyn jaqsartý qajettiligi bar, — habarlady vedomstvodan.
Budan bólek, jekelegen ýchaskelerde jol belgileri men shaqyrymdyq kórsetkishterdiń jetispeýi, sondaı-aq keıbir elementterdiń túngi ýaqytta jaqsy kórinýi úshin jaryq shaǵylystyrý qasıetterin kúsheıtý qajettiligi tirkeldi.
Barlyq anyqtalǵan eskertýler jedel shara qabyldaý úshin «QazAvtoJol» UK» AQ men «QAJservıs» JShS-ne joldandy.
Júrgizilip jatqan tekserý jumystary turaqty ári júıeli túrde júzege asyrylady. Bul jumystar jol qozǵalysy qaýipsizdigin arttyrýǵa, jol ınfraqurylymynyń sapasyn jaqsartýǵa jáne jol paıdalanýshylary úshin qolaıly ári qaýipsiz orta qalyptastyrýǵa baǵyttalǵan.
Eske sala keteıik, respýblıkalyq mańyzy bar joldarda 140 myńǵa jýyq jol belgisi ornatylǵan. Jol qaýipsizdigi jónindegi keshendi nysanaly baǵdarlama aıasynda jyl saıyn 10 myńǵa jýyq belgi jańartylady.
