13,5 mlrd teńge tıimsiz jumsalǵan: Elektrondyq qarjy ortalyǵyna júrgizilgen aýdıt aıaqtaldy
ASTANA. KAZINFORM — «Elektrondyq qarjy ortalyǵy» qyzmetine júrgizilgen memlekettik aýdıt aıaqtaldy. Tekserý barysynda memlekettik qarjy salasyndaǵy aqparattyq júıelerdi damytý jáne súıemeldeý boıynsha jumys baǵalandy.
Joǵary aýdıtorlyq palata júrgizgen aýdıt barysynda nazar aýdarýdy jáne olardy joıý boıynsha sharalar qabyldaýdy talap etetin birqatar kemshilik anyqtaldy.
— Máselen, strategııalyq basqarýda olqylyqtar bar: 2023-2024 jyldardaǵy damý josparlarynyń oryndalýy týraly eseptilik joq, jekelegen kórsetkishter oryndalmaǵan, ishki aýdıt qyzmetiniń is-sharalary tolyq oryndalmaıdy ne merzimi saqtalmaıdy, — delingen Joǵary aýdıtorlyq palata habarlamasynda.
Bıýdjet protsesiniń ıntegratory retinde EQO jumysy qanaǵattanarlyq dep baǵalanady, alaıda uıymnyń ishki normatıvtik qujattary jańartylmaǵan. Bul júrgiziletin jumystyń tıimdiligin shekteýi múmkin.
Qyzmetter qunyn esepteýde EQO ártúrli tásilderdi qoldanady. Aýdıtorlardyń pikirinshe, qate baǵa belgileý táýekelderin azaıtý úshin baǵa saraptamasyn júrgizý jáne jumys pen kórsetiletin qyzmetterdi bólek esepke alýdy qamtamasyz etý qajet.
— Tekserý barysynda aqparattyq qaýipsizdikti qamtamasyz etý máselesine kóp kóńil bólindi. Súıemeldeýdegi, senimgerlik basqarýdaǵy aqparattyq júıeler, sondaı-aq «Elektrondyq kommertsııalyq satyp alý» AJ boıynsha negizgi aqparattyq qaýipsizdik talaptary buzylǵan, — delingen qujatta.
Keıbir aqparattyq júıeler tolyqqandy jumys rejıminde qoldanylady, degenmen olar resmı túrde áli de tájirıbelik jumys satysynda.
Sonymen qatar birqatar qoldanystaǵy tsıfrlyq júıeniń jumysyna ruqsatsyz aralasý múmkindigi bar. Aýdıt barysynda «Elektrondyq memlekettik satyp alý» aqparattyq júıesine tehnıkalyq ózgerister engizýdiń 600-den astam jaǵdaıy anyqtaldy. Mysaly, tájirıbe men ruqsat qujattaryn tekserýdi óshiretin ózgerister engizilgen. EQO-nyń osy baǵyttaǵy tásilderi baqylaýdy jetildirýdi jáne kúsheıtýdi talap etedi.
— Jalpy aýdıt qorytyndysy boıynsha 566 mln teńgege qarjylyq buzýshylyq anyqtaldy. Qarajatty tıimsiz josparlaý jáne paıdalaný 13,5 mlrd teńge boldy. Joǵary aýdıtorlyq palata anyqtalǵan máseleler boıynsha qajetti usynymdar men tapsyrmalar berdi. Olardyń oryndalýy baqylaýda bolady, — delingen habarlamada.
Aıta ketelik aýdıtik tekseristen keıin áleýmettik tólemder júıesinde 216 mlrd teńge orynsyz jumsalǵany anyqtalǵan edi.