1300-ge jýyq jumysshy maman memlekettik marapatqa ıe boldy — Erlan Qarın
ASTANA. KAZINFORM — Bıyl Prezıdent jarlyǵymen 1300-ge jýyq jumysshy mamandyq ókili memlekettik marapatqa ıe boldy. Respýblıka kúni qarsańynda túrli salalarda eńbek etetin 500-den astam qyzmetker, eńbek áýletteriniń 138 ókili marapattalǵan. Memlekettik keńesshi Erlan Qarın Jumysshy mamandyqtar jylynyń qorytyndysyn baıandady.
Erlan Qarın 2025 jyl elimiz úshin tabysty bolǵanyn atap ótti. 11 aıdyń qorytyndysy boıynsha ekonomkamyz 6,4% ósim kórsetti. Otandyq zaýyttarda 147 myń avtokólik qurastyryldy. 17 mln sharshy metrge jýyq baspana salyndy. Densaýlyq saqtaý salasynda 219 jańa nysan salyndy. 130 jańa mektep paıdalanýǵa berildi. Jańadan 173 22 myń jumys orny quryldy.
— Dıqandarymyz ekinshi jyl qatarynan rekordtyq kólemde 27 mln tonna astyq jınady. 13 myń shaqyrym jol rekonstrýktsııa men jóndeýden ótti. Uzyndyǵy 836 shaqyrym Dostyq Moıynty temir jol jelisiniń ekinshi jelisi iske qosyldy. Munyń bári qur statıstıka emes, munyń artynda myńdaǵan adamnyń eńbegi jatyr. Olar qarapaıym jumysshylar, ınjenerler, mehanızatorlar, qurylysshylar, energetıkter, tehnologtar, dıqandar jáne basqalar. Osy jetistikter el azamattarynyń kózge kórinbeıtin kúndelikti ortaq jumystarynyń jemisi, — dedi Memlekettik keńesshi elordada Kongress ortalyqta ótken saltanatty jıynda.
Onyń aıtýynsha, osy jáne ózge de mańyzdy jetistikter ózara tyǵyz baılanysty eki faktordyń nátıjesi boldy. Birinshisi — el Prezıdentiniń bastamasymen júzege asyrylyp jatqan ekonomıkada, basqarý júıesinde, áleýmettik salada jáne ınfraqurylymda júrgizilgen júıeli ári aýqymdy reformalar.
— Al ekinshiden, árbir azamattyń qosqan úlesi. Óıtkeni birde-bir reforma ózdiginen jumys istemeıdi. Ol naqty ári qarapaıym adamdardyń eńbegimen, bilimimen jáne jaýapkershiligimen tolyqqanda ǵana iske asady. Zańdar qabyldaýǵa, qarjy bólýge, zaýyttar men kásiporyndar salýǵa bolady, biraq kásibı mamandarsyz, óz isin biletin ári jumys isteýge nıetti adamdarsyz munyń bári tek jospar kúıinde qalýy múmkin. Dál osy sebepti jumysshy mamandyqtar jylynyń mańyzy aıryqsha. Bul jyl qurylymdar men baǵdarlamalarǵa emes, eńbek adamyna, beıbitshilik pen kásibılik qundylyqtaryna arnalǵan, — dedi Erlan Qarın.
Erlan Qarın memlekettik nagradalar júıesi jańartylyp, jańadan 9 salalyq qurmetti ataq engizilgenin eske saldy. Memleket basshysy bıyl kásibı merekeler aıasynda energetıkterdi, qutqarýshylardy, muǵalimderdi, munaıshylardy, dárigerlerdi, sý sharýashylyǵy salasynyń qyzmetkerlerin, aýyl sharýashylyǵy mamandaryn Aqordada arnaıy qabyldap, quttyqtady.
— 24 kásibı mereke men eńbek kúnin keń kólemde atap ótý ıgi dástúrge aınaldy. Jalpy osy jyly Prezıdent jarlyǵymen 1300-ge jýyq jumysshy mamandyq ókili memlekettik marapatqa ıe boldy. Osynyń barlyǵy — eseli eńbekti qadirleýge baǵyttalǵan mańyzdy qadam. Bul eńbek adamy memleket saıasatynyń basty nazarynda degen sóz, — dedi Memlekettik keńesshi.
Bıyl Respýblıka kúni qarsańynda túrli salalarda eńbek etetin 500-den astam qyzmetker, eńbek áýletteriniń 138 ókili, 200-den astam ǵalym, pedagog jáne medıtsına qyzmetkeri memlekettik nagradalarmen marapattalǵan.
Al eń joǵary memlekettik nagrada — «Qazaqstannyń Eńbek Eri» ataǵy bıyl Soltústik Qazaqstan oblysynyń qarapaıym mehanızatory Murat Qarajumanovqa jáne Qaraǵandy oblysynyń qarapaıym jumysshysy, óz mamandyǵy boıynsha 40 jyldan astam eńbek etken Sergeı Chernovoıǵa berildi.
— Bul neni bildiredi? Bul saıasattyń ózgergenin nemese qazirgi tilmen aıtqanda, oıyn erejeleriniń aýysqanyn bildiredi. Endi memleket pen qoǵamnyń qurmeti men nazarynda medıaataq emes, qarapaıym eńbek adamdarynyń — muǵalimderdiń, dárigerlerdiń, energetıkterdiń, kólik salasy qyzmetkerleriniń, dıqandardyń jáne basqa da mamandardyń naqty úlesi tur. Bul jumys, bul saıasat aldaǵy ýaqytta da jalǵasyn tabady, — dedi Erlan Qarın.
Aıta keteıik, Astanada Jumysshy mamandyqtar jylyn qorytyndylaýǵa arnalǵan saltanatty is-shara ótti. Búginde el ekonomıkasynda jumyspen qamtylǵandardyń 3,3 mln adamy jumysshy mamandyqtar boıynsha eńbek etip jatyr. Olar eki myńǵa jýyq túrli tehnıkalyq kásipterdi qamtyp otyr.
Jumysshy mamandardy qoldaý jalǵasa beredi.