130 shaqyrymdyq alaman: Tarpań márege 6 saǵat 38 mınýtta jetti
Tańda bastalǵan alaman tús aýa qyza túsken. Úkilep ákelgen 33 attyń barlyǵy márege jetpeıtini orta jolda belgili bolǵan. Bir at aıaǵyn inge tyǵyp alsa, biriniń syrǵasy taıyp, birneshe at jarysty erte aıaqtady. Degenmen, ázirge eshbir at boldyryp nemese zoryǵyp qulaǵan joq.
Jyldamdyqtan góri tózimdilik synǵa túsken báıgede aldyńǵy úsh oryndy Katonqaraǵaı aýdanynyń úsh aty ıemdenip ketti. Úsh attyń ıeleri bólek adamdar ekenin aıta ketý kerek. Máre syzyǵyn birinshi bolyp kesken - Erbolat Toqsanovtyń «Tarpań» atty tulpary.
Attardyń tańǵy saǵat 7.47-de jarysqa shyqqanynyn buǵan deıin habarlaǵan bolatynbyz. «Tarpań» 130 shaqyrymdy 6 saǵat 38 mınýtta júrip ótip, ıesine 1 mln teńgeniń júldesin syılady.
Júldeli tórtinshi oryndy Aıagóz aýdanynyń kúligi ıelense, 5,6,7 -oryndardyń júldesin Zaısan aýdanynyń arǵymaqtary aldy.
«Bul at buryn-sońdy báıgege túspegen. Jylqy ishinde bos júrgen mal edi. Ákesi jaǵynan da, sheshesi jaǵynan da jartylaı asyl tuqymdy deýge bolady. Shabandozy - Sergeı Rybın degen jumysshym. 15 jasynan beri meniń janymda mal baǵyp, at baptap keledi. Qazir jasy 28-de. Osy «Tarpańdy» báıgege daıyndaǵan da ózi. Tańdaýy teris bolmaǵan sııaqty. Atymyz márege aman jetkenine qýanyshtymyz», - deıdi at ıesi Erbolat Toqsanov.
