130 mln teńge: SQO-da jylý beretin kompanııa tutynýshylarǵa qaryz

Tabıǵı monopolııalardy retteý komıtetiniń Soltústik Qazaqstan oblysy boıynsha departamenti bıyl 33 azamattyq jáne ákimshilik isterge qatysyp, sonyń 22-si vedomstvo paıdasyna sheshildi, dep habarlaıdy Kazinform. 

Tabıǵı monopolııalardy retteý komıtetiniń Soltústik Qazaqstan oblysy boıynsha departamenti basshysy Damır Toqtamysovtyń aıtýynsha, tutynýshylardyń quqyǵyn qorǵaý úshin oblystyq mamandandyrylǵan aýdanaralyq ekonomıkalyq sotyna birneshe talap-aryz jiberildi. Nátıjesinde «Sevkazenergosbyt» JShS jylý energııasyn turmystyq emes 1249 tutynýshysyna 95 mln 877 myń teńgeni qaıtarýy tıis.

«Budan bólek kóp qabatty turǵyn úılerde keńse, dúken ashqan, olardy jalpy úılik jylý eseptegish quraly bar 29 525 jylý energııasyn tutynýshyǵa 33 mln 206 myń teńge qaıtarady», - deıdi Damır Toqtamysov.

Quzyrettilik aıasynda departamenttiń ókilderi ákimshilik quqyq buzýshylyq boıynsha is qozǵap, ony qaraı alady.

«Bıyl departament «Sevkazenergo» AQ-ǵa 2018 jáne 2020 jyldary ınvestıtsııalyq baǵdarlamany oryndamaǵany úshin jalpy somasy 5,5 mln teńge ákimshilik aıyppul saldy. Sonymen birge «Sevkazenergo» AQ satyp alý tártibin saqtamaǵany úshin 4,9 mln teńge mólsherinde ákimshilik aıyppul túrindegi ákimshilik jazaǵa tartyldy. Bekitilgen tarıfke sáıkes qyzmetterdi kórsetý boıynsha mindettemeni oryndamaǵany úshin «Alpash» JShS-ne 588 myń teńge ákimshilik aıyppul salyndy», - deıdi departament basshysy.

Jalpy bıyl respýblıkalyq bıýdjetke barlyǵy 6 mln astam teńge óndirildi. Sondaı-aq bıyl vedomstvo «Soltústik-Qazaqstan Elektrjelistik Taratý Kompanııasy» AQ-na shaǵym boıynsha jospardan tys tekseris júrgizdi, zań buzýshylyqtar anyqtalǵan joq. Osyndaı tekseris «Vıktorııa 2003» JShS-ne de júrgizildi, onyń nátıjesimen kelispegen seriktestik sotqa shaǵym túsirdi.