130 memleket Parıjdiń klımat jónindegi kelisimine qol qoıýǵa daıyn ekenin habarlady
ASTANA. QazAqparat - 22 sáýir kúni BUU-nyń Nıý-Iorktegi shtab-páterinde byltyrǵy jyldyń jeltoqsan aıynda Parıjde qabyldanǵan klımat boıynsha tarıhı kelisimge qol qoıýdyń «joǵary deńgeıdegi rásimi» ótedi. Oǵan álemniń 130 eli qatysýǵa daıyn ekenin habarlady.
130 memlekettiń ókilderi qujatqa qol qoıý úshin uıymdastyrylǵan sharanyń alǵashqy kúninde qol qoıady. Olardyń arasynda 60 memlekettiń nemese úkimettiń basshylary bar.
Klımat jónindegi kelisim 2015 jyldyń jeltoqsan aıynda BUU-nyń klımatty ózgertý máseleleri boıynsha Sheńberlik konventsııasyna qatysýshy elderdiń 21-shi konferentsııasynda qabyldandy. Ol tómenkómirtekti jáne ekologııalyq turaqty bolashaqqa bastaýy tıis. Qujatta jahandyq temperatýranyń kóterilýin Tselsıı boıynsha 1,5 gradýs deńgeıinde ustap turý kózdeledi.
Parıjdiń klımat jónindegi kelisimi ony kem degende 55 el bekitkennen keıin otyz kún ishinde kúshine enedi.
Foto: Sergeı Gýneev
