130-baptyń dekrımınalızatsııalanýyn mańyzdy sheshim dep sanaımyn – Armanjan Baıtasov

NUR-SULTAN. QazAqparat – Prezıdenttiń jala jabý týraly bapty dekrımınalızatsııalaý jónindegi ustanymy qýantady. Ulttyq qoǵamdyq senim keńesiniń múshesi, Qazaqstan Medıa Alıansynyń tóraǵasy Armanjan Baıtasov búgingi Ulttyń keńestiń otyrysy týraly pikirin osylaı bildirdi, dep habarlaıdy QazAqparat HAA.

«Jalpy men úshin óte jaqsy áser boldy, bul otyrys. Búgin mańyzdy kezdesý boldy dep sanaımyn. Óıtkeni, Ulttyq senim keńesiniń músheleri arasyndaǵy, sondaı-aq ártúrli komıtetterde talqylanǵan usynystar Prezıdenttiń baıandamasynda qandaı da bir túrde kórinis tapty», - dedi Armanjan Baıtasov.

Sarapshy saıası reformalarǵa, onyń ishinde saıası partııalarǵa qatysty jáne mıtıngilerge qatysty eskertýler sıpatyna erekshe nazar aýdardy.

«Biz qazir birtindep damyp jatqan elmiz, reforma turǵysynan alǵanda damý evolıýtsııalyq túrde júrip jatyr. Biz ózara kelisimge kelip, reformalardyń eń durys jáne túsinikti joldaryn izdestirip jatyrmyz. Bul óte mańyzdy», - dep atap ótti Medıa Alıans basshysy.

Sondaı-aq onyń paıymynsha, QR Qylmystyq kodeksi 130-babynyń (Jala jabý) qylmystyq sıpat dep tanylmaýy jýrnalıster jumysynyń múmkindikterin keńeıtetin bolady.

«130-bapqa qatysty aıtar bolsam, jýrnalıst retinde, medıa salasynyń qyzmetkeri retinde, Qazaqstan Medıa Alıansynyń tóraǵasy retinde, árıne, osy baptyń qylmystyq sıpattan alyp tastalatyny qýantady. Óıtkeni sóz bostandyǵy, meniń oıymsha, memlekettiń turaqty damýyna yqpal etedi. Osy baptyń dekrımınalızatsııalanýy jýrnalısterdiń batyl jumys isteýine múmkindik beredi. Jýrnalıstik zertteýler qaıta shyǵa bastaıdy, jýrnalıster sapaly materıaldar daıyndaýǵa umtylady. Sosyn bizdiń de jýrnalısterdi kóp oqı bastaıdy. Sondyqtan da, 130-bapty qylmystyq sıpattan alyp tastaý týraly sheshim óte mańyzdy boldy dep sanaımyn», - dedi Armanjan Baıtasov.

Eske sala keteıik, búgin Nur-Sultan qalasynda Ulttyq qoǵamdyq senim keńesiniń ekinshi otyrysy ótip, onda Memleket basshysy Qasym-Jomart Toqaev sóz sóılegen bolatyn.