13 jylǵa sozylǵan «Esqula» sý qubyry bıyl paıdalanýǵa beriledi

ASTANA. QazAqparat – QR Ekologııa jáne tabıǵı resýrstar mınıstri Zúlfııa Súleımenova qurylysy uzaqqa sozylǵan sý jobalary týraly aıtty, dep habarlaıdy QazAqparat tilshisi.

«Esqula sý qubyryn salý 2010 jyly bastaldy jáne birneshe ret túzetýlerge ushyrady. Osyǵan baılanysty nysandy paıdalanýǵa berý keshiktirildi. Qazir bul nysan sý resýrstary salasyndaǵy «uzaq qurylys» nysandarynyń Jol kartasyna engizilgen. Bul rette qazir qurylys-montajdaý jumystary júrgizilip jatqanyn, barlyq tıisti qarjy qarajaty bólingenin atap ótemin. Barlyq jumystardy bıylǵy maýsym aıynda aıaqtaý josparlanýda», - dedi Z. Súleımenova Úkimettiń búgingi otyrysynda.
Mınıstrdiń aıtýynsha, atalǵan Jol kartasynda Presnov toptyq sý qubyry 1-kezek jobasy da bar. Onyń qurylysy 2014 jyly bastaldy, 2018 jylǵa deıingi merdiger «SMP-610» JShS boldy, óz mindettemelerin tıisinshe oryndamaýyna baılanysty sot sheshimimen shart buzylǵan. Sonymen qatar, 2017 jyly jobany túzetý júrgizildi. Sebebi SQO ákimdiginiń hattaryna sáıkes, Esil men Mámlút aýdandarynda 6 aýylda (100 adamnan az) halyq sanynyń azdyǵyna baılanysty osy sý jınaý qurylystarynyń kesheni sý taratý pýnktine aýystyryldy.
Jobany jalǵastyrý úshin 2018 jyly «QazSýShar» RMK-men shart jasaldy. Qurylys qunynyń smetalyq esebi 2012 jylǵy baǵamen bekitilgenin eskere otyryp, materıaldardyń qymbattaýy sebepti qurylysty jalǵastyrý múmkin bolmaǵan. Búgingi tańda jobany túzetýdiń oryndylyǵy týraly respýblıkalyq bıýdjettik komıssııasynyń sheshimi shyqty.
«Jobany túzetýdi 2023 jyldyń mamyrynda aıaqtalady. Budan ári bas merdiger qalǵan 81 km magıstraldy tóseıdi. Sodan keıin sorǵy jáne tazartý jabdyqtaryn baılaý jáne qosý júzege asyrylady. Bul rette 2023 jyly qurylys-montajdaý jumystaryn jalǵastyrýǵa 1 mlrd teńge qarastyrylǵanyn atap ótemiz. Nysan 2024 jyldyń sońynda aıaqtalady. Nátıjesinde 23,2 myń adam turatyn 12 aýyldy sýmen jabdyqtaý jaqsarady», - dedi Ekologııa mınıstri.
Sonymen qatar, Aqmola oblysynyń Qorǵaljyn jáne Egindikól aýdandarynda Nura toptyq sý qubyrynan sý berý boıynsha halyqtyń shaǵymdary bar, onyń 75% tozǵan.
«Ony tolyq rekonstrýktsııalaý úshin mınıstrlik jobalaý-smetalyq qujattama ázirleýde, ony bıylǵy jyl sońynda aıaqtaý josparlanyp otyr. Odan ári iske asyrý kezeń-kezeńimen 4 kezekte júrgiziledi», - dedi Zúlfııa Súleımenova.
Buǵan deıin spıker Qazaqstannyń qaı óńirlerinde sý qubyrlary jańartylatynyn aıtqan edi.