13 jobaǵa jer qoınaýyn paıdalanýshylardan jınalǵan qarjy jumsaldy
ASTANA. QazAqparat - Ǵylymı zertteý jumystaryn qarjylandyrýǵa jer qoınaýyn paıdalanýshylardan shamamen 900 mln teńge tartyldy, dep habarlaıdy QR IDM-nyń baspasóz qyzmeti.
«Innovatsııalyq tehnologııalar parki» derbes klasterlik qory Qazaqstan naryǵynda jer qoınaýyn paıdalanýshylar men ınnovatsııalyq kompanııalar yntymaqtastyǵynyń jańa modelin usynady. Bul model boıynsha ınnovatsııalarǵa degen suranysty ınnovatsııalyq ónimderdiń basty tutynýshylarynyń biri bolyp tabylatyn jer qoınaýyn paıdalanýshylar qalyptastyrady», delingen habarlamada.
Model boıynsha jer qoınaýyn paıdalanýshylar ózderiniń naqty maqsattary men sharttaryn belgilep, tehnıkalyq tapsyrmalaryn ázirleıdi. Innovatsııalyq kompanııalar men startaptar berilgen tehnıkalyq tapsyrmaǵa sáıkes óz sheshimderin jetildiredi. Saraptamalyq baǵalaýdan ótken jobalardy qarjylandyrý máselesin tapsyrys bergen jer qoınaýyn paıdalanýshylar qarastyrady. Osylaısha, «ITP» DKQ jer qoınaýyn paıdalanýshylarǵa olardyń ǵylymı-zertteý jáne tájirıbelik-konstrýktorlyq jumystarǵa (ǴZTQJ) jyldyq jıyntyq tabystarynyń 1%-yn baǵyttaý jónindegi mindetterin oryndaýǵa múmkindik alady.
2016 jyly «ITP» DKQ jer qoınaýyn paıdalanýshylardan 14 tehnologııalyq tapsyrma qabyldady. Oryndaýshylar irikteýdi «ITP» DKQ veb-portaly, sondaı-aq, jer qoınaýyn paıdalanýshylar jáne ınnovatorlarmen kezdesýler ótkizý arqyly júzege asyrdy. Sonymen birge, tapsyrystarǵa oryndaýshylardy irikteý protsesin tıimdirek júrgizý maqsatymen aǵymdaǵy jyldyń ishinde 4 ret Startup Day ınnovatsııalyq baıqaýy ótkizildi. Atalmysh baıqaýlardyń barysynda ınnovatsııalyq kompanııalar men startaptar óz sheshimderin jer qoınaýyn paıdalanýshylarǵa usynýǵa múmkindik aldy.
Atqarylǵan jumystardyń nátıjesinde 2016 jyldyń qańtar-qarasha aılarynda jer qoınaýyn paıdalanýshylardan 874 526 106 teńge mólsherinde qarajat jınaldy. 13 joba qarjylandyryldy. Atalǵan jobalar ǵylymı-zertteý jumystaryn, óndiristik monıtorıngti júrgizýge, qorshaǵan ortaǵa keltiretin áserdi baǵalaýǵa, jumys úderisin ońtaılandyrýǵa baǵyttalǵan:
1. Karerdegi mashınalardyń ornalasýy men kılometrajyn baqylaý;
2. Jynystar úıindisiniń qaýipsizdik jaǵdaılarynyń negizinde ońtaıly parametrlerdi anyqtaýǵa baǵyttalǵan ǵylymı-zertteý jumystary;
3. Ǵylymı zertteý jumystary - kómir razrezindegi endogendik órtti sóndirý jáne aldyn alý jónindegi basshylyq;
4. Qaýipsizdik jaǵdaılaryn eskere otyryp, karerdiń jumystyq betkeıleriniń maksımaldy parametrlerin daleldeýge baǵyttalǵan ǵylymı-zertteý jumystary;
5. Ken ornyndaǵy tehnogendi mıneraldy túzilimderdi tıimdi jolmen rekýltıvatsııalaý tásilderi boıynsha taldaý ázirleý;
6. Kómir ken ornyn ıgerýdegi ekologııalyq-gıdrogeologııalyq jáne ınjenerlik-geologııalyq jaǵdaılardy baǵalaý;
7. Jańa tehnologııalyq jabdyqtardy ornatý nátıjesinde energııalyq tıimdilikti arttyrý boıynsha ǵylymı-zertteý jáne tájirıbelik-konstrýktorlyq jumystar;
8. Óndiristiń qorshaǵan ortaǵa tıgizetin áserin baǵalaý;
9. Qorshaǵan orta óndiristik monıtorıngi;
10. Ken ornynyń ónerkásiptik ıgerý jobasyn ázirleý;
11. Metall teńgerimi men materıaldyq aǵyndardyń qozǵalys modelin ońtaılandyrý jumystaryn júrgizý boıynsha tehnıkalyq tapsyrma;
12. Jynystardyń fızıka-mehanıkalyq qasıetterin laboratorııada anyqtaı otyryp, ken oshaǵyndaǵy tabıǵı kerneýli kúıi men basty kerneý baǵyttaryn anyqtaýǵa baǵyttalǵan ǵylymı zertteý jumysy.
Atqarylǵan jobalar tapsyrys berýshilerdiń joǵary baǵasyna ıe boldy. Qazirgi kezde jer qoınaýyn paıdalanýshylardyń kezekti tehnologııalyq tapsyrystaryn sheshýge baǵyttalaǵan jańa sharttar qurastyrylýda. «ITP» DKQ tehnologııalyq tapsyrystardy qabyldaý protsesin odan ári tıimdirek júrgizý maqsatymen qazirgi ýaqytta jer qoınaýyn qoldanýshylarmen kelissózder men túsindirý jumystaryn júrgizýde. Osynyń nátıjesinde kelesi jyly qarjylandyrylǵan jobalardyń sanyn 30-ǵa deıin ulǵaıtý josparlanyp otyr.
