13 jyl kútken páter: Aqtaý turǵyny baspanasynyń jaǵdaıyna shaǵymdandy
AQTAÝ. KAZINFORM — Aqtaýda jetim balalar sanatyna jatatyn turǵynǵa berilgen páterdiń jaǵdaıy narazylyq týǵyzdy. Áıeldiń aıtýynsha, baspana 13 jyl kútkennen keıin berilgenimen, páterde jóndeý jumystary tolyq aıaqtalmaǵan. Qala ákimdigi turǵynnyń shaǵymyna jaýap berdi.
Alevtına Medvedevanyń aıtýynsha, ol baspanany shamamen 13 jyl kútken. Páterdi bıyl jazda alǵan. Alaıda páterde jóndeý jumystary júrgizilmegen bolyp shyqty. Qabyrǵalar men edenniń taza árleýi jasalmaǵan, bólmearalyq esikter ornatylmaǵan. Sonymen qatar qurylys jáne elektr montajdaý jumystary da tolyq aıaqtalmaǵan.
— Qabyldaý-tapsyrý aktisine qol qoıǵan joqpyn. Qalalyq turǵyn úı-kommýnaldyq sharýashylyq bólimine júgindim. Onda máseleni biledi jáne 24 tamyzǵa deıin jóndeý jumystaryn júrgizýge ýáde berdi, — deıdi Alevtına Medvedeva.
Alaıda belgilengen merzimge sanaýly kún qalǵanyna qaramastan, turǵynnyń aıtýynsha, páterde jóndeý jumystary áli bastalmaǵan. Ol turǵyn úı-kommýnaldyq sharýashylyq bólimine resmı ótinish joldap, páterdi komıssııalyq tekserýden ótkizýdi suramaq. Sondaı-aq baspananyń qandaı jaǵdaıda tapsyrylýy tıis ekenin kórsetetin qujattardy berýdi talap etip otyr.
Osy jaǵdaıǵa qatysty Aqtaý qalalyq ákimdigi resmı jaýap berip, atalǵan páterde jóndeý jumystary júrgizilip jatqanyn habarlady.
— 2024 jyly bıýdjet qarajaty esebinen Aqtaý qalasynda turǵyn úıge muqtaj retinde esepte turǵan áleýmettik osal sanattaǵy azamattar úshin 500 páter satyp alyndy. Atalǵan páterlerdi satyp alý memlekettik satyp alý rásimderine sáıkes túrli qurylys uıymdarymen kelisimsharttar jasasý arqyly júzege asyryldy. Turǵyn úıge muqtaj retinde esepte turǵan Aqtaý qalasynyń turǵyny Alevtına Aleksandrovna Medvedevaǵa 2024 jyly satyp alynǵan páterlerdiń qatarynan berilgen baspanada merdiger uıym — «K7 Group» qurylys kompanııasy jóndeý jumystaryn júrgizip jatyr. Jóndeý jumystaryn aıaqtaýdyń boljamdy merzimi — 30 kún. Jaǵdaı baqylaýda, — delingen habarlamada.
Buǵan deıin Aqtóbede qabyrǵasy qaq aıyrylyp turǵan eki qabatty úıdiń turǵyndary kómek surady.
