13 jastaǵy jasóspirim polıtsııaǵa terrorızm aktisi týraly jalǵan habar bergen

ASTANA. QazAqparat - Almaty oblysynda terrorızm aktisi týraly jalǵan habarlama bergen jasóspirim ustaldy, – dep habarlaıdy Polisia.kz saıtyna silteme jasap.

Ondaǵy derekterge qaraǵanda, 30 qarashada Talǵar aýdandyq Polıtsııa basqarmasynyń kezekshi bólimine kolledjderdiń birinde terrorızm aktisi bolatyny jaıynda aqparat kelip tústi.

Oqıǵa ornyna saperler, kınologtar jáne basqa da mamandar shaqyrylyp, barlyq ǵımarat tekserildi. Aqparat rastalmady. Bul quqyq buzýshylyq Talǵar aýdany PB-da QR QK 273-baby «Terrorızm aktisi týraly kórineý jalǵan habarlama» boıynsha tirkeldi. Jedel-izdestirý jumystary barysynda kúdiktiniń kim ekeni anyqtaldy. Ol 13 jastaǵy jergilikti turǵyn bolyp shyqty.

Qazirgi ýaqytta tergeýshiler kámeletke tolmaǵan balanyń zańdy ókilderi men psıhologtardyń qatysýymen barlyq qajetti tergeý áreketterin júrgizip jatyr.

Terrorızm aktisi týraly kórineý jalǵan habarlaǵany úshin bes myń aılyq eseptik kórsetkishke deıingi mólsherde aıyppul (búgingi kúni – 14,5 mln teńge) ne sol mólsherde túzeý jumystary túrindegi jaza, sondaı-aq bes jylǵa deıingi merzimge shekteý nemese bas bostandyǵynan aıyrý kózdelgen.