13 jastaǵy múgedek qyzyn qorlaǵan áıel analyq quqyǵynan aırylýy múmkin

13 jastaǵy Dıananyń jaǵdaıy búkil eldi alańdatyp otyr. Anasy ony 3 jyl boıy dalaǵa shyǵarmaı, baılap ustaǵan. 

Balany senimhatpen qamqorlyǵyna alǵan Qapshaǵaı turǵyny Nadejda Barsýkovanyń aıtýynsha, anasy Anna Ivanova 1990 jyldary ózi de balalar úıinen tárbıelenip shyqqan eken. 

«Anıa Ivanovany meniń anam qamqorlyqqa alǵan. Onyń úsh balasy bar. Úlken qyzy 14 jasynda turmysqa shyǵyp ketken, ortanshysy Dıana bolsa, kishisi Sofııa qazir anasymen turady. Anıa esirtki satqany úshin 2 ret túrmege otyryp shyqqan. Birinshisinde anam aıap, shyǵaryp aldy. Ekinshisinde 5 jyl otyryp shyqty. Sol kezde Dıana balalar úıine ótken, al kishi qyzdy týǵan ákesi alyp ketken. Túrmeden shyqqan soń áıeldiń Dıanany balalar úıinen qaıtaryp alǵanyn estidik. Oǵan jataqhanadan bólme kerek bolǵan. 
Kóp uzamaı telearnadan ájesi nemeresin baldaqpen uryp, basyn jarǵany týraly jańalyq estidik. Sol qyz Dıana bolatyn», - dedi N.Barsýkova.

Osy jaǵdaıdan soń áıel Dıananyń jaǵdaıy týraly surastyra bastaıdy. «Qyz Reseıde oqyp jatyr» degen jeleýmen Anıa ony úıine jolatpaıdy. 

Kúnderdiń kúninde Nadejda Annanyń úıine eskertýsiz barǵan. 

«Kirsem, Dıana shúberekterdiń ústinde buryshta jatyr eken. Bala basyn burǵanda túrinen shoshyp kettim. Bala jabaıy bolyp ketken. Anasy oǵan terezeden qaraýǵa ruqsat bermegen. Bala 3 jyl boıy dala kórmegen. Birde ony stolǵa baılap ketken eken. Sol sátte bala qarny ashyp, aıaǵyn sheship, tamaq iship alǵan soń qaıtadan baılaý jolyn bilmegen. Anasynyń qaharynan qorqyp, qashyp ketýdi oılaıdy. Balkonǵa shyǵyp, sekirmek bop turǵanda aınaladaǵy kórshiler polıtsııa, jedel járdem shaqyryp, aman alyp qalǵan»,- deıdi N.Barsýkova. 
2017 jyldyń 17 tamyzynda Nadejda Barsýkova Annany kóndirip, qyzdy 3 jylǵa senimhatpen alyp ketken. 

Sodan beri jas qyz jańa otbasyna úırenip keledi. Qazir Dıananyń áke-sheshesi, eki inisi bar. 

«Meniń qyzym paıda bolǵaly beri ózimdi shynymen ana sezinip kelemin. Qyzym sát saıyn kelip qushaqtaıdy, súıedi. Meni eshkimge bermeshi dep ótinedi», - deıdi qamqorlyqqa alǵan anasy.

Dıananyń oń jaq qoly men aıaǵynda gemıparez baıqalady. Qulaǵy kesilgen, qol-aıaǵy, murny synǵan. Tisteri túsip qalǵan. 

«Qyzym ózi sal aýrýynyń jeńil túrimen aýyrady. Aýzynda qoıan jyryq sııaqty aqaýy bar. Bastapqy úsh aıda túnimen shyńǵyryp, jylap shyǵatyn. Psıhıkasy asa aýyr zaqym alǵan edi. Qazir de keıde birnársege jumsasań, umytyp qaıtyp keledi nemese qaıda turǵanyn umytyp qalady. Qazir aqyryndap qalpyna kelip jatyr», - deıdi N. Barsýkova. 
Qazir Nadejda Barsýkova qyzyn asyrap ala almaı otyr. Ol úshin aldymen Anna Ivanovany analyq quqyǵynan aıyrý kerek. Nadejda 2017 jyldyń kúzinde polıtsııaǵa aryzdanǵan bolatyn. Alaıda, tergeý isi bir núkteden qozǵalar emes.
 

«Anıa Ivanova tún ishinde maǵan habarlasyp, aryzymdy alyp ketýimdi ótinip jatyr. Ol úshin balasynan ózim-aq bas tartamyn dep otyr. Biraq men kelispedim. Balany qınap, ómirin qorlaǵan adam jazasyn alýy tıis. Men ony jazalamaı qoımaımyn», - dedi Nadejda Barsýkova. 

Qalalyq ІІD baspasóz qyzmetiniń jetekshisi Saltanat Ázirbek atalǵan máslege qatysty túsinikteme berdi. 

«Qazir atalǵan derek boıynsha QR QK 114-babynyń, 3-bólimimen is qozǵalyp, sotqa deıingi biryńǵaı tergeý reestrine tirkeldi. Birqatar kúrdeli saraptamalar taǵaıyndaldy. Endi anasyn analyq quqyǵynan aıyrý máselesi sot quzyrynda», - dedi Saltanat Ázirbek.