13 jastaǵy qazaqtyń saıatshy qyzy aǵylshyn basylymynyń keıipkerine aınaldy - FOTO
ASTANA. QazAqparat - Aǵylshynnyń Daily Mail basylymynda «Altyn qyz: Qazaqtyń salt-dástúrindegi asyl qundylyqtardyń biri - qusbegilik ónerin ıgergen on úsh jasar jalǵyz qyz» degen taqyryppen maqala jarııalandy. Onda Mońǵolııada turatyn Aısholpan (Ashol Pan) esimdi 13 jastaǵy qyz álemdegi eń jas qusbegi ekendigi aıtylǵan.
Bir kezderi ızraıldik áskerdiń fotosýretshisi bolyp jumys istegen Asher Svıdenskıı PR salasyna den qoıyp, odan týrısterge jolnusqaýshy bolyp jumys isteı bastaǵan. Ol kóbinese Mońǵolııanyń taýly aımaqtaryn betke alyp, sol óńirlerdegi mádenıetti sýretke túsirýdi ermegine aınaldyrǵan.
«Ásirese, ol óz sýretterinde búginde kómeski tartyp, joǵala bastaǵan ejelgi salt-dástúrlerdiń biri qusbegilik ónerdiń ókilderine erekshe mán beredi» dep jazady basylym.
Jalpy, mońǵol taýlarynyń bókterinde jol kórsetetin saıahatshylardyń kóbi bul mekendi attyń ústinde júrip aralaýǵa májbúr. Óıtkeni Ortalyq Azııa eliniń bul bóliginde kólik júretin joldar sanaýly ǵana. Asher Svıdenskıı osyndaı kúnderdiń birinde (týrısterge gıd bop júrgende) segiz jasynda qusbegilik ónerdi ıgere bastaǵan Mońǵolııadaǵy eń jas búrkitshi - on tórt jasar Bahak Bırgendi keziktirgen. Bahakty sýretke túsirgennen keıin fotograf taǵy bir búrkitshini sýretke túsirýge bel baılaıdy. Oǵan ýaqyty men qarjysy jetkilikti bolǵan soń, saıatshy qyz balany túsirsem dep jolǵa shyǵady. Sóıtip júrgende kezdeısoq Aısholpannyń ákesimen kezdesken.
Saıatshy qyzdy sýretke túsirý úshin fotograf tórt aı boıy jas qusbeginiń úıinde qonaq bolǵan. Aısholpannyń ákesi, dástúr boıynsha úıdiń úlken balasy (ásirese uly) jaýyngerge saı tárbılený kerektigin aıtqan. Sondaı-aq Aısholpan úıdiń úlkeni bolǵan soń ony salt-dástúrge saı ulttyq ónerdi meńgerip ósýine barynshy kúsh salyp otyrǵanyn da jasyrmaǵan.
