13 jastaǵy almatylyq bala týrnıkte qaýipti trıýkterdi oryndaıdy

Strıt-vorkaýt — týrnık ne brýsıada oryndalatyn jattyǵýlarǵa negizdelgen sport túri. Onyń ishinde tartylý, qolmen turý, túrli akrobatıkalyq jáne statıkalyq elementter bar. Muny sportsúıer qaýymnyń sýbmádenıeti dep te ataıdy eken. Bul sport túri kúsh, tózimdilik, eptilik pen tepe-teńdikti damytady. 

Almatyda mundaı sportpen aınalysatyn jasóspirimderdiń biri – Ismaıl Jumabaı. Ismaıl Almatydaǵy № 211 mektep-gımnazııasynda 7 synypta oqıdy. Anasynyń aıtýynsha, onyń sportqa qyzyǵýshylyǵy 1 synyptan bastalǵan. 5 jasynda dostarymen týrnıkke tartylyp júrgen bala artynsha túrli trıýkterdi oryndap úırengen kórinedi.

— Dostarymen birge týrnıkke tartylyp, sportqa qyzyǵyp júrdi. Dene bitimine, as mázirine mán berip, «endi salmaq qosý úshin kómirsý jeýim kerek» dep aıtatyn. Sońǵy úsh jylda «vork-aýtqa» bet burdy. Biz mundaı sport túri bar ekenin de bilmedik. Sóıtsek «vorkaýter» degen maman ıeleri de bar eken. Balam osylaı óz betimen jattyǵyp, dostarynan, Tiktok syndy jelilerdegi vıdeolardan trıýkterdi úırenedi, — dedi anasy Botagóz Rahımjanova.

Ismaıl birneshe trıýk elementterin kórsetti. Olardy úırený úshin kúsh-jiger, ýaqyt pen júıeli daıyndyq kerek. Týrnıkte tartyla alý úshin qol myqty bolý kerek. Sol úshin qolyn qataıtatyn jattyǵýlar jasap, shynyǵady. Al trıýkterdi oryndaý úshin eptilikti damytady.

Onymen qosa ýaqyt úzbeı daıyndalý keregin aıtady. Máselen 360 elementin oryndaý úshin 1 aı ýaqyt ketken. 360 elementinde sportshy týrnıkke asylyp turyp, denesin aýada tolyq bir aınaldyryp, qaıtadan týrnıkti ustaý qalýy kerek.

Al eń qıyny – 540 elementi deıdi. Onda adam aldymen týrnıkke kóterilip, keıin aýada denesin 540 gradýsta aınaldyryp, qaıtadan týrnıkti ustap qalady. ıAǵnı aýada 1,5 ret aınalady.

Strıt-vorkaýt qıyndyqtary

Bul sporttyń ózindik qıyndyqtary bar. Máselen kishkentaı sportshynyń qoly týrnıkten qajalyp, únemi súıel bolyp turady eken. Tipti súıel jarylyp, irińdep ketýi múmkin.

— Vorkaýterlerdiń qoly sondaı qatty bolady. Bul qalypty nárse. Jara ulǵaıyp ketse, ınfektsııa bolmas úshin qoldy óńdep, 2-3 kún kútiný kerek, – dedi kishkentaı vorkaýter.

Onymen qosa Ismaıl túrli trıýk úırenemin dep 2 ret oń qolyn syndyryp, aıaǵyn aýyrtqan eken.

Sol sebepti otbasy jasóspirimniń mundaı nársemen aınalysqanyna qarsy bolǵan. Ásirese anasy týrnıkte jasalatyn elementterge qarap, shoshyǵanyn jasyrmady.

– Birinshi ret qolyn syndyrǵan kezde otbasymyzben aýrýhanada júrgenbiz. Qatty ýaıymdadyq. Keıin qoly jazyldy. Biraq taǵy qulap, osy qolyn qaıta syndyrdy. Osydan keıin ákesi ekeýmiz ulymyzǵa tyıym saldyq. «Keıin múgedek bolyp qalýyń da múmkin» dep sóıledik. Ornyna MMA, qazaqsha kúres syndy sport jattyǵýlaryna apardyq. Qazir dombyra úıirmesine, aǵylshyn kýrsyna da barady. Degenmen balamnyń oıy týrnıkte, — dedi Ismaıldyń anasy.

Ana júregi qansha ýaıymdasa da, balasynyń bul ónerine tosqaýyl qoımaı, aqyrynda kelisipti. Aıtýynsha, ulynyń bul sport túrine degen mahabbaty onyń minezine, salaýatty ómir saltyn ustanýyna da yqpal etken. Bala zııan ádetterden aýlaq júrip, zııan tamaqtarǵa múldem qyzyqpaıdy.

— Basqa qalalarda júrse de, týys, dos-jaranmen júrgende de, týrnıkti taýyp alyp, ónerin kórsetip júredi. Óz nátıjesine kóńili tolady. Qansha ýaıymdaǵanymmen, qazir ol elikteıtin, bir nársege qyzyǵatyn jasta ekenin túsinemin. Qýys-qýysta temeki shegip, alkogolge qyzyqqansha, osyndaı sport túrine qyzyqqany durys ta sııaqty. Esesine sport ony eseıtti, balalyǵyn qoıyp, maǵan qolǵabys bolady, – dedi Botagóz Rahımjanova.

Ári qaraı ózin jetildirý úshin almatylyq oqýshy tek áýesqoı emes, kásibı túrde vorkaýtpen aınalysqysy keledi eken. Degenmen bolashaǵyn bul sportqa baılap qoımaı, kásipker bolýdy da armandaıtynyn aıtty.

Eske salsaq, Almatylyq oqýshy BUU shtab-páterinde álemniń úzdik 3 jas ınnovatorynyń qataryna engen edi.