13 jasar tennısshi Zańǵar Nurlanuly Parıjdegi týrnırdiń fınalısi atandy
NUR-SULTAN. QazAqparat – Frantsııa astanasy Parıj qalasynda 14 jasqa deıingiler arasynda Tennis Europe serııasy boıynsha birinshi sanattaǵy týrnır máresine jetti, dep habarlaıdy QazAqparat tilshisi.
Qazaqstan tennıs federatsııasynan málim etkendeı, aıtýly dodaǵa álemniń 30 elinen 160-tan astam jas oıynshy qatysty
Qazaqstannan jarystyń birinshi raketkasy Zańǵar Nurlanulymen birge Danıel Tazabekov, Damır Jalǵasbaı, Sátıma Tóregen jáne Arıana Gogýlına baq synady.
Zańǵar Nurlanuly fınalda tartysty matchta germanııalyq Nıls Makdonaldqa ese jiberdi – 6:7 (4:7), 4:6.
Zańǵar fınalǵa barar jolda aldymen frantsııalyqtar Arıan Kalıtera men Kıpren Shıvalırdi tize búktirdi. Sosyn ıtalııalyq Rafael Chıýernellıdi joldan taıdyrdy. Shırek fınalda mysyrlyq Eıad Mohammed Sherıftan aılasyn asyrdy – 7:6 (7:3), 6:2. Jartylaı fınalda jarystyń 4-raketkasy, frantsııalyq Tımeo Trýfellıdi oısyrata jeńdi – 6:1, 6:2.
Bul týrnırdiń ereksheligi, mundaǵy básekeler ataqty Roland Garros korttarynda ótedi. Kezinde munda ár jyldary jasóspirim shaǵynda Rafael Nadal, Gael Monfıs, Stefanos Tsıtsıpas, Karlos Alkaras jáne basqalar jeńimpaz atanǵan bolatyn.
Qyrǵyzstannyń Cholpon-Ata qalasynda ITF Juniors serııasy boıynsha ótken besinshi sanattaǵy týrnırde qaraǵandylyq Vıtalıı Zatsepın tamasha óner kórsetti.
Ol fınalda kort ıesi Ilgız Kamchıbekovti utty – 6:3, 6:1. Juptyq synda V.Zatsepın Jakas Kozbakpen birge qazaqstandyqtar Oleg Gýsakov – Darhan Jaqangerge jol berdi – 7:6 (7:1), 1:6, 4:6.
Osynda juptyq synda Anastasııa Krymkova chempıon atandy. Ol qyrǵyzstandyq Vladıslava Andreevskaıamen birge Qaraqat Qoılybaeva – Darıa Shýbınany bas júldesiz qaldyrdy – 6:1, 6:2.
Grýzııada 18 jasqa deıingiler arasynda tórtinshi sanattaǵy ITF jarysynda almatylyq Іńkár Dúısebaı fınalǵa deıin jetti.
Sońǵy básekede Іńkár ulybrıtanııalyq Gabı Paskaýskaspen birge túrkııalyqtar Irem Kıýrt – Dýrý Sokege ese jiberdi – 6:1, 5:7, 11:13. Jekeleı synda І.Dúısebaı jartylaı fınalda Natalı Djanıden utyldy – 3:6, 6:2, 5:7.
Taǵy bir almatylyq Robert Kamınskıı Germanııada 12 jasqa deıingiler arasynda birinshi sanattaǵy Tennis Europe dodasynda juptyq synda ozyq shyqty. Jekeleı synda ol jartylaı fınalda reseılik Aleksandr Kýnıtsynnan jeńildi – 3:6, 3:6.
Osylaısha, bul jarystar Qazaqstanda Elena Rybakınanyń izbasarlary ósip kele jatqanyn kórsetti.
Eske sala keteıik, budan buryn Elena Rybakınanyń alǵash ret Ýımbldon týrnıriniń chempıony atanǵanyn jazǵan bolatynbyz.
Sondaı-aq Ýımbldon chempıony Elena Rybakına barsha jankúıerlerine alǵysyn jetkizdi.
