13 jasar qyzdyń ólimi: Máıittiń ishki aǵzalary urlanǵany týraly aqparat – feık
KÓKShETAÝ. QazAqparat – Kókshetaýda joǵalyp, máıiti segiz kúnnen keıin tabylǵan 13 jasar jasóspirimniń ishki aǵzalary alynǵandyǵy týraly jalǵan aqparat tarady, dep habarlaıdy QazAqparat tilshisi Aqmola oblystyq PD baspasóz qyzmetine silteme jasap.
Vedomstvonyń málimetinshe, áleýmettik jelidegi WhatsApp messendjerinde tamyzdyń 21-de joǵalyp, 28-kúni Krasnoıar kentinen 5 shaqyrym jerden tabylǵan jasóspirim qyzdyń ishki aǵzalary alynǵandyǵy týraly aýdıojazba taraǵany anyqtaldy.
«Atalmysh aqparat shyndyqqa janaspaıdy. Qazirgi kezde polıtsııa qyzmetkerleri jalǵan aqparattyń avtoryn jáne ony taratqan adamdardy anyqtap jatyr. Aqmola oblysynyń polıtsııasy men prokýratýra qyzmetkerleri azamattarǵa jalǵan aqparatty taratqany úshin qoldanystaǵy zańnamaǵa sáıkes qylmystyq jaýapkershilik qarastyrylatynyn eskertedi, sondaı-aq, shyndyqqa janaspaıtyn aqparattardy taratpaýǵa jáne tek resmı málimetterge ǵana sený kerektigin aıtady», - deıdi vedomstvodan.
Osy rette, tártip saqshylary jalǵan aqparat avtorymen birge, ony taratqan tulǵa da Qylmystyq kodeksiń 274 baby boıynsha qylmystyq jaýapkershilikke tartylatynyn óńir turǵyndarynyń nazaryna salýda.
«Sonymen birge, QR QK 99 baby «adam óltirý» boıynsha tergeý júrgizilýde. Al, Qylmystyk kodekstiń 315 baby «adam máıittiń aǵzalary men tinderin zańsyz alý» boıynsha qosymsha epızod jóninde másele qarastyrylǵan joq jáne qarastyrylmaıdy da», - dep tolyqtyrdy vedomstvodan.
Osy iske baılanysty ózge málimetter tergeý múddesi úshin jarııalanbaıdy. Tergeý barysy PD bastyǵynyń jeke baqylaýynda.
Eske sala keteıik, 2020 jyldyń 20-shy tamyzynda Kókshetaýda 13 jasar jasóspirim iz-túzsiz joǵalyp ketip, keıin 8 kún ótken soń jerge kómilgen denesi tabyldy.
