13 jasar qyz kóz jumǵan jol apatyna baılanysty Sátpaev ákiminiń orynbasary jazalandy

ULYTAÝ. KAZINFORM — Sátbaev qalasy ákiminiń orynbasary jaqynda jol-kólik oqıǵasy bolǵan kóshe qıylysynda jol tańbalarynyń bolmaýyna baılanysty jaýapkershilikke tartyldy.

Ulytaý oblysynyń PD qyzmetkerleri 16 maýsymda Sátbaev qalasynda bolǵan jol-kólik oqıǵasy faktisi boıynsha sotqa deıingi tergep-tekserý amalyn bastady. Oqıǵa jaıaý júrginshiler ótkelinde bolǵan. Toyota markaly jeńil avtokóliktiń júrgizýshisi 13 jasar qyz balany qaǵyp ketip, ol alǵan jaraqattary saldarynan oqıǵa ornynda kóz jumdy.

Kólik quralynyń júrgizýshisi ýaqytsha ustaý ızolıatoryna qamaldy.

Júrgizýshiden bólek qala ákiminiń orynbasary da jaýapqa tartyldy.

— Joldarda jumys isteý boıynsha talaptardy oryndamaǵany úshin, atap aıtqanda tıisti belgilerdiń bolmaǵany úshin Sátbaev qalasy ákiminiń orynbasary jaýapkershilikke tartyldy, — dep habarlaıdy Ulytaý oblystyq PD baspasóz qyzmeti.

Sondaı-aq, polıtsııa departamenti buǵan deıin Sátbaev qalasynyń jergilikti atqarýshy organyna jaıaý júrginshiler ótkeline jol belgilerin qoıý jóninde nusqama jiberilgenin atap ótti.

Tergeý barysyn oblystyq polıtsııa departamentiniń basshylyǵy baqylaýǵa aldy.

— Oqıǵanyń mán-jaıyn anyqtaý jáne kinálilerdi qoldanystaǵy zańnamaǵa sáıkes jaýapkershilikke tartý úshin barlyq qajetti sharalar qabyldanady, — dep tolyqtyrdy vedomstvodan.

Osyǵan deıin Astanadaǵy avtobýs apatynda aıaǵynan aıyrylǵan qyzdyń otbasyna 20 mln teńgege jýyq tólem jasalǵany týraly habarlaǵan bolatynbyz.