13 jasar bala Kabýldan Delıge deıin ushaqtyń shassı qýysyna tyǵylyp ushqan

ASTANA. KAZINFORM – Aýǵanstandyq jasóspirim ushaqtyń shassı qýysyna tyǵylyp, Kabýldan Delıge deıin 94 mınýt ushyp, aman qalǵan, dep jazdy AZƏRTAC agenttigi.

Qundyz qalasynan kelgen 13 jastaǵy ul bala Iranǵa barǵysy kelgen. Sol maqsatta ol áýejaıǵa kelip, ushaqtyń artqy dóńgelekteriniń janyna, ıaǵnı shassı ornalasqan jerge tyǵylǵan. The Indian Express basylymynyń jazýynsha, onyń janynda tek «qyzyl tústi shaǵyn aýdıodınamıka» bolǵan. Alaıda, ol tyǵylǵan ushaq Tegeranǵa emes, Delıge baǵyt alǵany keıin belgili boldy.

Ushý ýaqyty 90 mınýttan astam bolǵan. Ul bala aman qalǵan jáne ony Indıra Gandı atyndaǵy halyqaralyq áýejaıdyń (IGI) qyzmetkerleri tapqan. Qaýipsizdik qyzmetkerleriniń aıtýynsha, balany Delıdegi áýejaıdan tańǵy 10:20 shamasynda baıqaǵan. Keshke qaraı ol qaıtadan Kabýlǵa jóneltilgen.

Jolaýshylar ushaqtary ádette ushatyn 10–11 km bıiktikte aýa temperatýrasy -60 °C-qa deıin tómendeıdi jáne mundaı bıiktikte ottegi jetispeıdi.

Eske sala keteıik, buǵan deıin Japonııada ushaq shuǵyl qonýǵa májbúr bolyp, bes adam jaraqat alǵanyn jazǵan bolatynbyz.