13 trln teńge bólindi: Qazaqstannyń ınjenerlik ınfraqurylymy jańartylmaq
ASTANA. KAZINFORM – Memleket basshysynyń tapsyrmasymen Úkimet energetıkalyq jáne kommýnaldyq sektorlardy jańǵyrtý ulttyq jobasyn iske asyryp jatyr. Elimizdegi búkil bazalyq ınfraqurylymnyń aýqymdy qurylysy halyqtyń turmys sapasyn arttyrýǵa jáne ekonomıkanyń odan ári ornyqty ósýin qamtamasyz etýge baǵyttalǵan.
Úkimettiń málimetinshe, 2025-2029 jyldary bul maqsatqa jalpy kólemi 13 trln teńge ınvestıtsııa tartý josparlanǵan.
Ulttyq ekonomıka vıtse-mınıstri Asan Darbaevtyń aıtýynsha, 2024 jyldyń sońynda qabyldanǵan ulttyq jobanyń maqsaty – ınjenerlik ınfraqurylymnyń tozýyn kezeń kezeńimen tómendetý, energııamen jabdyqtaý júıesiniń senimdiligin arttyrý jáne halyqqa kórsetetin kommýnaldyq qyzmetterdiń sapasyn jaqsartý.
2025 jyly jobany iske asyrýdyń ınstıtýtsıonaldyq negizi tolyq qalyptasty. Osy baǵytta bıýdjet, qurylys jáne óńirlik damý salalary boıynsha qajetti ózgerister qabyldandy. Jobany iske asyrý úshin elektrondy platforma iske qosyldy.
– Ulttyq jobany júzege asyrýda tabıǵı monopolııalar sýbektileriniń 247 uıymy qamtylyp otyr. 2029 jylǵa qaraı 70 kommýnaldyq kásiporyndy táýekeli joǵary daǵdarystyq aımaqtan shyǵarý josparlanyp otyr. Turaqty ınfraqurylymy bar kásiporyndar úlesi shamamen 3/2-sin quraýǵa tıis, – dedi A.Darbaev búgingi Úkimet otyrysynda.
2025-2029 jyldarǵa jalpy ınvestıtsııa kólemin iske asyrý 13 trln teńgeni quraıdy. Onyń ishinde 6 trln 800 mlrd teńgeni kommýnaldyq sektorǵa, al 6 trln 200 mlrd teńgeni – energetıka sektoryna baǵyttaý josparlanyp otyr.
– Bul qarajattyń esebinen 84 myń shaqyrym ınjenerlik jeli jóndelip, jańǵyrtylady. Jalpy qýaty 7309 megavatt bolatyn energııa kózderi iske qosylady. Sondaı-aq 27 energııa óndirý nysany salynyp, jańǵyrtylady. Nátıjesinde jelilik ınfraqurylymnyń tozý deńgeıi el boıynsha orta eseppen 40% deıin tómendetý kútilip otyr. Obektilerdegi apattylyq deńgeıi 25% deıin qysqarady, – dedi Ulttyq ekonomıka vıtse-mınıstri.
Aıta keteıik, búgin Mınıstrler kabıneti energetıka jáne kommýnaldyq sektorlardy jańǵyrtý taqyrybyn talqylaıdy.
