13 tamyz. Kazinform kúntizbesi. Tulǵalar týǵan kún
Búgin, 13 tamyz kúni tulǵalardan kimder dúnıege kelgen? Kazinform oqyrmandaryna esimder kúntizbesin usynady.
ESІMDER
85 jyl buryn (1941) belgili fılolog-ǵalym, qazaq tilin damytýǵa belsene aralasqan qoǵam qaıratkeri, Memlekettik tildi damytý qory Qamqorshylyq keńesiniń múshesi, «Qazaq tili», «Qazaqstan musylman áıelderi», «Adam quqyǵyn qorǵaý» qoǵamdarynyń qatysýshysy Asyly Álıqyzy OSMAN dúnıege keldi.
Grýzııada týǵan. Qazaq memlekettik qyzdar pedagogıkalyq ınstıtýtyn, QazSSR Ǵylym akademııasy Til bilimi ınstıtýtynyń aspırantýrasyn bitirgen.
1969-1993 jyldary QazSSR Ǵylym Akademııasy Til bilimi ınstıtýtynyń aspıranty, kishi, aǵa ǵylymı qyzmetkeri. 1993-1997 jyldary QR Til komıtetiniń, QR ult saıasaty jónindegi memlekettik komıtetiniń bólim bastyǵy, basqarma bastyǵy. «Turan» Ázerbaıjan mádenı ortalyǵynyń vıtse-prezıdenti boldy. 1997 jyldan beri zeınet demalysynda.
Almaty oblysy ázerbaıjan etno-mádenı ortalyǵynyń tóraıymy, «Memlekettik tilge – qurmet» birlestiginiń jetekshisi, qazaq tilindegi kóptegen ǵylymı kitaptar men sózdikterdiń avtory. Baspasózde 200-den astam ǵylymı jáne aýdarma maqalalary jaryq kórdi. «Sınonımdik etistikterdiń semantıkalyq-stılıstıkalyq qyzmeti» (1991), «Qazaqsha-túrikshe-oryssha sóz tirkesi» (1994), t.b kitaptardyń avtory.
«Parasat», ekinshi dárejeli «Dostyq» ordenderimen, Baýyrjan Momyshuly atyndaǵy «Namys», «Til janashyry», «Qazaqstan Respýblıkasynyń Mádenıet qaıratkeri», «Belsendi qyzmeti úshin», «Qazaqstan Konstıtýtsııasyna 10 jyl» (2005), «10 jyl Astana» (2008) medaldarymen marapattalǵan.
