13 sý qoımasyn salý jobasy ázirlenip jatyr
ASTANA.KAZINFORM - Sý resýrstary jáne ırrıgatsııa mınıstrligi 13 sý qoımasyn salý jáne 18 sý qoımasyn rekonstrýktsııalaý jobalaryn ázirlep jatyr.
Sý resýrstary jáne ırrıgatsııa mınıstri Nurjan Nurjigitov Parlament Senatynyń otyrysyna qatysyp, onda qazirgi ınfraqurylymdyq jobalardyń júzege asyrylýy men transshekaralyq sý resýrstaryn basqarý salasyndaǵy yntymaqtastyqtyń damýy týraly baıandady.
Sý salasyn damytýdyń keshendi jospary aıasynda 42 jańa sý qoımasyn salý, qoldanystaǵy 37 sý qoımasyn rekonstrýktsııalaý jáne 14,5 myń shaqyrym sýarý kanalyn jańǵyrtý kózdelgen.
Qazirgi tańda úsh jańa sý qoımasynyń qurylysy bastaldy. Túrkistan oblysynda eki sý qoımasynyń qurylysy aıaqtalýǵa jaqyn. Mınıstrlik taǵy eki sý qoımasyn salýǵa arnalǵan jobalyq qujatty ázirleýdi aıaqtady. Sonymen qatar 13 nysannyń jobalyq qujattary daıyndalyp jatyr. Al jergilikti atqarýshy organdar 22 sý qoımasynyń qurylys jobalaryn ázirlep jatyr.
Sondaı-aq mınıstrlik bes sý qoımasyn rekonstrýktsııalaý jumystaryn aıaqtady. Segiz sý qoımasyn qaıta jańǵyrtýǵa arnalǵan jobalyq qujat tolyq daıyndaldy. Qazir taǵy 18 nysan boıynsha qujattar ázirlenip jatyr. Jergilikti atqarýshy organdar bir sý qoımasyn rekonstrýktsııalap, taǵy jeti nysanda jumystardy jalǵastyryp jatyr.
Mınıstrlik málimetinshe, búginge deıin 1,5 myń shaqyrym sýarý kanaly jańǵyrtyldy. Bıyl jalpy uzyndyǵy 4,6 myń shaqyrym bolatyn kanaldardy jańǵyrtý jumystary júrgizilip jatyr.
– Jalpy alǵanda, sý qoımalaryn salý jáne rekonstrýktsııalaý, sýarý kanaldaryn jańǵyrtý men avtomattandyrý, sondaı-aq ekonomıkanyń túrli salalarynda sý únemdeý tehnologııalaryn engizý 2030 jylǵa qaraı shamamen 10 mlrd tekshe metr sýdy únemdeýge jáne qosymsha jınaqtaýǵa múmkindik beredi, - dedi Sý resýrstary jáne ırrıgatsııa mınıstri Nurjan Nurjigitov.
Aıta keteıik, elordada táýligine 188 myń tekshe metr sý tazartatyn jańa nysan salynady.
