13-shi Premer-Mınıstrge qandaı mindetter júkteldi
ASTANA. KAZINFORM – Búgin Májilistiń jalpy otyrysy ótip, alqaly jıynǵa arnaıy qatysqan Memleket basshysy Qasym-Jomart Toqaev elimizdiń on úshinshi Premer-Mınıstrin taǵaıyndaý úshin depýtattardyń kelisimin aldy. Osylaısha, Úkimet basshysy qyzmetine buǵan deıin Prezıdent Ákimshiliginiń basshysy bolǵan Oljas Bektenov keldi.
Prezıdent aldymen Májilistegi saıası partııalar fraktsııalarynyń jetekshilerimen kezdesý ótkizip, Konstıtýtsııanyń 44-babyna sáıkes Premer-Mınıstr laýazymyna usynylǵan Oljas Bektenovtiń kandıdatýrasy jóninde fraktsııa basshylarymen keńesti. Talqylaýǵa «Amanat» partııasy fraktsııasynyń jetekshisi Elnur Beısenbaev, Qazaqstan Halyq partııasy fraktsııasynyń jetekshisi Magerram Magerramov, «Aq jol» partııasy fraktsııasynyń jetekshisi Azat Perýashev, Jalpyulttyq sotsıal-demokratııalyq partııasy fraktsııasynyń jetekshisi Ashat Raqymjanov, «Aýyl» partııasy fraktsııasynyń jetekshisi Serik Egizbaev, «Respublica» partııasy fraktsııasynyń jetekshisi Aıdarbek Hodjanazarov qatysty.
Úkimet qyzmetinde 4 qasıetti ushtastyrýy tıis
Osydan keıin Májilistiń jalpy otyrysy ótip, onda Qasym-Jomart Toqaev Qazaqstandy ozyq elge aınaldyrý qajettigin, bul – jaı uran emes, naqty jospar ekenin atap ótti.
«Bizge keregi – damýdyń sara joly. Sondyqtan túbegeıli saıası reformalar júrgizýmen qatar, elimizdiń qoǵamdyq-ekonomıkalyq ómirinde tereń ózgerister jasaý úshin batyl sharalar qabyldaýymyz qajet. Eń bastysy, bizdiń barlyq is-áreketimiz «Ádiletti Qazaqstan» qurý qaǵıdatyna saı bolýǵa tıis. Aldymen, elimizdiń áleýmettik-ekonomıkalyq saıasatyna jańa serpin berý kerek, ıaǵnı ekonomıkanyń barlyq salasyn damytý, yntalandyrý joldary men aldaǵy mindetterdi qaıta qaraý qajet. Túptep kelgende, memleket endi úzdiksiz qoldaý sharalarynan naǵyz sapaly damýǵa qolǵabys etý isine túbegeıli kóshýi kerek. Bul jumysty sóz júzinde emes, is júzinde oryndaıtyn ýaqyt jetti», – dedi Qasym-Jomart Toqaev.
Prezıdent Salyq jáne Bıýdjet kodeksteri, Memlekettik satyp alý, sondaı-aq Memleket pen jekemenshik áriptestigi týraly zańnamalar múlde jańasha sıpatqa ıe bolǵanyna nazar aýdaryp, munyń bári Jańa ekonomıkalyq saıasatty júzege asyrýdyń myqty tiregi bolýǵa tıis ekenin jetkizdi. Qasym-Jomart Toqaevtyń aıtýynsha, aldymyzda tarıf saıasatyndaǵy kedergilerdi joıý, agrosektordy qaıta jandandyrý, áleýmettik salany basqarý men qarjylandyrýdyń tıimdi tásilderin ázirleý mindeti tur.
«Bul jerde, árıne, eń aldymen, Úkimet mańyzdy ról atqarýǵa tıis. Jańa qarqynmen jumys isteý qajet. Mańyzdy sheshimderdi shuǵyl qabyldap, kóp sozbaı, sheshýshi qadamdardy jasaýy kerek. Úkimet óz qyzmetinde kásibılik, jaýapkershilik, jedeldik jáne bastamashyldyq sııaqty qasıetterdi ushtastyrýǵa tıis. Úkimet ekonomıkany halqymyzdyń ıgiligi úshin yntalandyrýǵa jáne ártaraptandyrýǵa baǵyttalǵan batyl ári tabandy sheshimder qabyldaýy qajet. Bul mindettiń mańyzy zor jáne ol strategııalyq sıpatqa ıe», – dedi Memleket basshysy.
Prezıdent sózin qorytyndylaı kele, «Amanat» partııasy usynǵan kandıdatty Májilistegi partııalar fraktsııalarynyń jetekshilerimen talqylaǵannan keıin ortaq sheshimge kelgenin aıtyp, Qazaqstan Respýblıkasy Konstıtýtsııasynyń 44-babynyń 3-tarmaqshasyna sáıkes Premer-Mınıstr laýazymyna taǵaıyndaýǵa kelisý úshin Oljas Bektenovtiń kandıdatýrasyn usyndy.
«Oljas Bektenov – tájirıbeli memlekettik qyzmetshi. Onyń Qazaqstan ekonomıkasy jáne basqa da salalar boıynsha bilimi mol, uıymdastyrý qabileti joǵary, ózi – tártipti, adal, eńbekqor azamat. Sondyqtan el ekonomıkasynyń aldynda turǵan maqsattardy júzege asyrýǵa qabileti jetedi dep oılaımyn», – dedi Qasym-Jomart Toqaev.
Jıynda Parlament Májilisindegi «Amanat», «Aq jol», «Respublica», «Aýyl» partııalary fraktsııalarynyń jetekshileri sóz sóılep usynylǵan kandıdatýrany qoldasa, JSDP men QHP partııasynyń músheleri daýys berýden qalys qalatyndyǵyn ashyq aıtty. Sodan keıin depýtattar Úkimet basshysynyń jańa kandıdatýrasyn daýysqa saldy: 69 depýtat qoldap, 7 halyq qalaýlysy qalys qaldy.
Úsh partııa qoldap, eki partııa qalys qaldy
«AMANAT» partııasy fraktsııasynyń jetekshisi Elnur Beısenbaevtyń atap ótýinshe, jańa Úkimetke artylar júk aýyr. Eldiń artqan amanatyn, Prezıdenttiń qoıǵan mindetterin, depýtattardyń bildirgen senimin aqtaý jaýapkershiligi tur.
«Sondyqtan, Premer-Mınıstrdiń kandıdatýrasyna bizdiń fraktsııanyń atynan Oljas Abaıuly Bektenovti usynamyz. Májilis depýtattaryn usynylyp otyrǵan kandıdatty qoldaýǵa shaqyramyn. Osyǵan oraı, barlyq bılik ókilderi birigip, Prezıdenttiń qoıǵan mindetterin bir jaǵadan bas, bir jeńnen qol shyǵaryp, aýyzbirshilikpen atqarýymyz kerek», - dedi ol.
«Aýyl» partııasynyń tóraǵasy Serik Egizbaev jańa Úkimet agroónerkásip kesheniniń problemalyq máselelerin sheshedi dep úlken úmit artatyndyǵyn basa aıtty.
«Aýyl» partııasy árqashan syndarly, konstrýktıvti pozıtsııa ustanǵan, sondyqtan da búgin Qasym-Jomart Kemeluly usynyp otyrǵan Premer-Mınıstr kandıdatýrasyn bizdiń partııa biraýyzdan úlken senimmen qoldaıdy. «Aýyl» partııasy jańa Premer-Mınıstr men jańa Úkimet músheleri Prezıdentimizdiń tapsyrmalaryn dereý oryndaıtyn jáne Parlament depýtattarynyń, onyń ishinde 8 mıllıonǵa jýyq aýyl turǵynynyń múddesin qorǵaıtyn partııa depýtattarynyń usynystaryn eskeretin, qulaq asatyn, qajet sheshimderdi tez qabyldaıtyn, yqpaldy Parlamentke esep beretin myqty Úkimet bolady dep úmit artamyz», — dedi ol.
Al «Respublica» partııasy fraktsııasynyń jetekshisi Aıdarbek Hodjanazarov jańa Premer-Mınıstrdiń ortalyq jáne óńirlik deńgeıde jumys isteý barysynda jınaǵan mol tájirıbesi elmizdiń básekege qabilettiligin kóterip, halqymyzdyń áleýmettik jaǵdaıynyń jaqsarýyna aıryqsha yqpal etedi dep senetindigin bildirdi.
Májilistegi Qazaqstan Halyq partııasy fraktsııasynyń jetekshisi, depýtat Magerram Magerramov jańa Premer-Mınıstrdiń kandıdatýrasyn kelisý kezinde fraktsııa músheleri ne sebepti qalys qalǵanyna túsinik berdi.
«Qurmetti Qasym-Jomart Kemeluly, Qazaqstan Halyq partııasynyń fraktsııasy Premer-Mınıstr laýazymyna Oljas Bektenovtiń kandıdatýrasyn bekitý boıynsha qalys qalý jóninde sheshim qabyldady. Qazaqstan Halyq partııasy fraktsııasynyń sheshimi — Úkimetke kózqarasty ózgertetin, jańa formalardy eski mazmunmen toltyrmaıtyn ýaqyt jetkeniniń belgisi. Jańa Premer-Mınıstrdiń naqty áreketterimen bizdiń kúmánimiz seıilmeıinshe bizdiń ustanymymyz osyndaı bolady», — dedi Magerram Magerramov.
Jalpyulttyq sotsıal-demokratııalyq partııasy fraktsııasynyń jetekshisi, depýtat Ashat Raqymjanov ta Memleket basshysy usynǵan kandıdatýrany kelisý kezinde ne sebepti qalys qalǵanyn túsindirdi.
«Biz kandıdatqa qarsy bolǵan joqpyz, bul joly qalys qaldyq. Bul qyzmette ekonomıkany tereńirek túsinetin, osy salany jaqsy meńgergen, osyǵan deıin ózin bul jaǵynan kórsete alǵan adamdy kórgimiz keledi», — dedi ol.
Otyrys sońynda Prezıdent Úkimet basshysy laýazymyna usynǵan kandıdatýrany qoldaǵan depýtattarǵa rızashylyǵyn bildirdi.
«Eń aldymen barshańyzǵa rızashylyǵymdy, raqmetimdi aıtqym keledi. Sizder joǵary saıası jáne azamattyq jaýapkershilikti kórsettińizder. Rasynda elimiz óte mańyzdy, tipti sheshýshi kezeńge jaqyndap qaldy. Máselen, «taıaý keleshekte Qazaqstan qandaı memleket bolady, onyń aımaqtyq jáne álemdik qoǵamdastyqta atqaratyn róli qandaı bolmaq?» degen asa mańyzdy suraqtar tur. Qazirgi básekege toly, túrli janjalǵa ushyraǵan turaqsyz, bulyńǵyr álemde Qazaqstan kúshti, bolashaǵyna senimmen qaraıtyn el bolýy kerek. Onyń bárin qamtamasyz etý — bárimizdiń ortaq mindetimiz, paryzymyz dep aıtýǵa bolady. Bul másele boıynsha Úkimettiń atqaratyn róli erekshe», — dep atap ótti Qasym-Jomart Toqaev.
Úkimet halqymyzdyń ıgiligine qyzmet etedi – Bektenov ýádesi
Osydan keıin Jańadan taǵaıyndalǵan Úkimet basshysy Prezıdenttiń júktegen joǵary senimin aqtaýǵa bar kúsh-jigerin salatynyn aıtty.
«Meniń kandıdatýramdy qoldaǵandaryńyz úshin shynaıy rızashylyǵymdy bildiremin. Ózderińiz biletindeı, Memleket basshysy elimizdiń ekonomıkasy men áleýmettik salasyn damytýda birqatar aýqymdy tapsyrma berdi. Atalǵan tapsyrmalardyń barlyǵy múltiksiz oryndalady. Buryn-sońdy bolmaǵan syn-qaterler dáýirinde zor ekonomıkalyq serpilis jasaýymyz kerek. Halyqtyń ál-aýqatyn arttyrý maqsatynda Úkimet batyl ári tıimdi qadamdar jasaıdy», — dedi O. Bektenov Májilistiń jalpy otyrysynda.
Onyń aıtýynsha, óńdeý salasyn jedel damytýǵa basa mán beriledi.
«Munaı-gaz jáne kómir hımııasy, metaldy tereń óńdeý, mashına jasaý, avtobólshekter shyǵarý, ıaǵnı joǵary deńgeıde óńdelgen ónim shyǵaratyn salalardy barynsha damytamyz. Otandyq óndirisimizdi yntalandyrýǵa baǵyttalǵan naqty sharalar qabyldanady. Retteletin satyp alý aıasynda Qazaqstanda jasalǵan taýarlardyń úlesin arttyryp, ondyqtyq óndirýshilerdi qoldaý maqsatynda ofteık júıesin tolyq iske qosamyz. Basty maqsat — basqa eldiń emes, ózimizdiń ulttyq bıznesimizdi qoldaý. Aýyl sharýashylyǵy salasynyń zor áleýetin durys paıdalaný mańyzdy. Et, sút, astyq ónimderin tereń óńdeýge nazar aýdaramyz. Elektr qýaty, jylý ári sýmen qamtamasyz etý baǵytynda belsendi jumys atqaramyz. Tıimsiz shyǵyndardy qysqartyp, únemdelgen qarajat ınfraqurylymdy jańartýǵa baǵyttalady. Kólik-logıstıka salasyn damytyp, elimizdiń tranzıttik áleýetin arttyrý — Úkimet jumysyndaǵy basymdyqtardyń biri bolatyny sózsiz. Tsıfrlandyrý, jasandy ıntellektiniń qoldaný salasyn keńeıtý, esepteý qýattaryn ulǵaıtý, asa mańyzdy mindetter. Memleket basshysy belgilegen zań men tártip qaǵıdatyn júzege asyrýǵa baǵyttalǵan sharalar qabyldaımyz. Basqa da halyqtyń kókeıinde turǵan ózekti máseleler únemi Úkimettiń nazarynda bolady. Úkimet halqymyzdyń ıgiligine, elimizdiń órkendeýine qyzmet etedi», — dedi Úkimet basshysy.
Aıta keteıik, 5 aqpanda Memleket basshysy «Qazaqstan Respýblıkasynyń Úkimeti týraly» jarlyqqa qol qoıyp, Úkimet otstavkaǵa jiberildi.
Prezıdent keńesshisi - baspasóz hatshysy Berik Ýálı Úkimet basshysyn taǵaıyndaý rásimi jóninde pikir bildirdi.
Memleket basshysyna «Amanat» partııasynyń atynan Premer-Mınıstrdiń kandıdatýrasy usynyldy.
Prezıdent Parlamenttegi partııa fraktsııalarynyń jetekshilerimen kezdesti.
Májilis depýtattary Premer-Mınıstr laýazymyna Oljas Abaıuly Bektenovti taǵaıyndaýǵa kelisim berdi.
