13 saǵatta 20 shaqyrym: Bir qoly men bir aıaǵy joq parasportshy Balqash kólin júzip ótti
QARAǴANDY. KAZINFORM – 27 jastaǵy parasportshy Aqnazar Mútálipov 8 shilde kúni Balqash kólin bir jaǵalaýynan ekinshi jaǵalaýyna deıin toqtaýsyz júzip ótip, 20 shaqyrymdyq aralyqty 13 saǵatta eńserdi.
Aqnazar bir qoly men bir aıaǵy joq adamnyń da sheksiz qashyqtyqty baǵyndyra alatynyn dáleldeýdi kózdegen.
– Men bul júzý arqyly eń aldymen ózime, odan keıin búkil álemge adamnyń bir qol, bir aıaqsyz da kez kelgen kedergini eńsere alatynyn dáleldegim keldi. Árıne, men álemdik rekord ornatqym keledi, – dep jazdy sportshy.
Qazir sportshy bul jetistigin Gınnestiń rekordtar kitabyna resmı tirkeý úshin demeýshiler men qoldaýshylar izdep jatyr.
Aqnazar Mútálipov mektep bitirgen soń temirjol salasynda eńbek ete bastaıdy. Alaıda 2018 jyly óndiristik jaraqat alyp, aýyr múgedektikke tap bolady. Osy sátten bastap ómiri kúrt ózgeredi. Júzýge ol bala kúninen qyzyqqan, biraq kásibı deńgeıde eshqashan aınalyspaǵan.
Jaraqattan keıin Aqnazar Balqashtyń jaǵasyna jıi baryp, sýda júzip kóre bastaıdy. Áýelgi áreketteri oń nátıje berip, bul jattyǵýlar oǵan kúsh pen senim bergen. Sýda ózin erkin sezine bastaǵan. Osydan keıin ol sanaly túrde parasportty tańdap, basseınge jazylyp, kásibı jattyqtyrýshynyń qol astynda júıeli daıyndyqqa kirisken.
Aqnazardyń tynymsyz eńbegi men tabandylyǵy 2024 jyldyń naýryz aıynda alǵashqy nátıjesin berdi. Ol Tarazda ótken jarysta 400 metrge júzýden birinshi oryn ıelendi. Budan soń ol ózine jańa maqsat qoıǵan — Býrabaı kólin júzip ótý.
Alǵashynda ol kóldiń uzyndyǵy 2 shaqyrym dep boljaǵanymen, naqty qashyqtyq 2,5 shaqyrym bolyp shyqty. Biraq sportshy bul mejeni de sátti eńserip, kóldi nebári 1 saǵatta júzip ótti.
Sol jyly Aqnazar Qazaqstan chempıony atanyp, 2025 jyly sport sheberligine kandıdat ataǵyn aldy.
Balqashty júzip ótý Aqnazar úshin jaı ǵana sporttyq shyń emes, úlken ómirlik beles boldy. Bul maqsatqa jetý úshin ol birneshe aı boıy úzdiksiz jattyqqanyn aıtady. Kúndelikti jattyǵýdy ómir saltyna aınaldyrǵan. 8 shilde kúni sol daıyndyq óz jemisin berdi — Aqnazar Balqash kólin bir shetinen ekinshi shetine deıin toqtaýsyz júzip ótti.
Osyǵan deıi Oralda ardager parasportshy 90 shaqyrymdy alty kúnde jaıaý baǵyndyrǵany jaıly jazǵan bolatynbyz.