13 páterdi tonaǵan: Jetisý oblysynda urylar ustaldy
ASTANA. KAZINFORM — Jetisý oblysynda birneshe aıdan beri óńir turǵyndaryn alańdatqan qylmystyq top qolǵa tústi. Kúdiktiler 23 mln teńgeden astam somaǵa páter urlyǵyn jasaǵan, dep habarlaıdy Polisia.kz.
Jedel-izdestirý is-sharalarynyń nátıjesinde 29 jáne 35 jastaǵy eki er adam ustaldy. Olar birqatar páter urlyǵyn jasady degen kúdikke ilindi. Tergeý málimetine sáıkes, 2025 jyldyń jeltoqsan aıynan 2026 jyldyń 19 naýryzyna deıin oblys aýmaǵynda 13 qylmys jasaǵan.
Qylmystyq áreketterdiń geografııasy birneshe aýdandy qamtyǵan:
- Eskeldi aýdany — 6 derek;
- Kóksý aýdany — 2 derek;
- Alakól aýdany — 3 derek;
- Aqsý aýdany — 2 derek.
Barlyq jaǵdaıda kúdiktiler bir tásildi qoldanǵan — turǵyn úılerge plastıkalyq terezelerdi kúshpen ashý arqyly kirip, úı ıeleri joq ýaqytty tańdaǵan. Keltirilgen jalpy shyǵyn shamamen 23 mln teńgeni qurady.
Ustaý kezinde kúdiktilerden aıǵaq zattar — urlanǵan altyn buıymdar tárkilendi.
— Bótenniń múlkine qol suǵý arqyly paıda tabýǵa tyrysqan árbir áreket mindetti túrde jaýapkershilikke ákeledi. Biz qylmystyq shemalardy júıeli túrde anyqtap, ár isti sońyna deıin jetkizemiz. Azamattardyń qaýipsizdigi — bizdiń basty basymdyǵymyz. Mundaı qylmystar jazasyz qalmaıdy, — dep atap ótti Jetisý oblysy polıtsııa departamenti krımınaldyq polıtsııa basqarmasynyń bastyǵy Daýren Qadyruly.
Qazirgi ýaqytta atalǵan fakti boıynsha sotqa deıingi tergeý júrgizilip, olardyń ózge de uqsas qylmystarǵa qatystylyǵy tekserilip jatyr. Kúdiktiler ýaqytsha ustaý ızolıatoryna qamaldy.
Jetisý oblysynda qoǵamdyq qaýipsizdikti qamtamasyz etý baǵytyndaǵy jumystar kúsheıtilgen rejımde jalǵasyp jatyr.
Osydan bir aı buryn Almatyda páterlerge urlyqqa túsip júrgen kúdikti ustaldy.