13 myńnan astam eldi meken órtke qorǵaný sharalarymen qamtamasyz etilmegen - V. Bojko
ASTANA. 15 qarasha. QazAqparat /Qanat Mámetqazyuly/ - Respýblıka boıynsha 13 myńnan astam eldi meken órtke qarsy qorǵaný sharalarymen qamtamasyz etilmegen.
Búgin QR Parlamenti Májilisinde ótken Úkimet saǵatynda Tótenshe jaǵdaılar mınıstri Vladımır Bojko osylaı málim etti.
«Eń birinshi kezekte elimizdiń shalǵaı eldi mekenderin, sondaı-aq dala alqaptaryn órtke qarsy qorǵaý sharalarymen qamtamasyz etý qajet. Búgingi kúni óńirlerdegi 13 myńnan astam eldi meken órtke qarsy qorǵaý júıelerimen qamtamasyz etilmegen. Olardyń basym bóliginde eń jaqyn degen órt sóndirý bólimi 50-den 200 shaqyrymdyq aralyqty quraıtynyn aıta ketý kerek. Memlekettik órt sóndirý qyzmeti bólimsheleriniń mundaılyq shalǵaıda ornalasýy is júzinde órtke jedel den qoıýǵa esh múmkindik bermeıdi», deıdi V. Bojko.
Onyń aıtýynsha, tek 2009 jyly mundaı eldi mekenderde 4 myń 91 órt bolsa, sonyń saldarynan materıaldyq shyǵyn 900 mln. teńgeden asqan. 128 adam qaza taýyp, 126 adam aýyr jaraqat aldy. «Bul baǵytta máseleni sheshý úshin erikti órt sóndirýshiler quramdaryn ashyp, olardyń quqyqtyq mártebesi men mindetterin anyqtaý qajet. Osy rette «Órt qaýipsizdigi týraly» zańǵa olardyń áleýmettik qorǵalý máselelerin kózdeıtin jańa túzetýler engizý kerektigin basa aıtqym keledi», dedi mınıstr.
