13 myń elordalyq stýdent páter jaldaýǵa májbúr
ASTANA. QazAqparat - Elordada 13 myń stýdentke jataqhanada oryn jetispeıdi. Bul týraly Astana qalalyq jastar saıasaty máseleleri jónindegi basqarmanyń basshysy Ashat Oralov aıtty, dep habarlaıdy QazAqparat.
«Qazirgi tańda basqarmamen jastarǵa áleýmettik lıfti qurýǵa, jastardyń boıyndaǵy otanshyldyq sezimin qalyptastyrýǵa, óskeleń urpaqtyń shyǵarmashylyq qabiletin anyqtaýǵa, jastardyń boıynda jemqorlyqtyń kez kelgen áreketine múldem tózbeýshilik qalyptastyrýǵa, salaýatty ómir saltyn nasıhattaýǵa, etnosaralyq kelisimdi nyǵaıtýǵa, ulttyq jáne otbasylyq saltty nasıhattaýǵa, stýdent jastardy qoldaýǵa, jastar bastamalary men ınnovatsııalyq ıdeıalaryn anyqtaýǵa, quqyqtyq mádenıet pen dinı tanymdy kóterýge baǵyttalǵan birqatar shara júzege asyrylyp jatyr. Atalǵan sharalar jastardyń ózekti problemalaryn eskere otyryp, memlekettik jastar saıasatyn jetildirýge baǵyttalǵan», - dedi ol Astananyń tóńireginde turatyn halyqtyń bos ýaqytyn tıimdi uıymdastyrý máselerine arnalǵan shara barysynda.
Basqarma basshysy resmı statıstıkalyq málimetterine sáıkes, 2016 jyldyń 1 qańtarynda qala jastarynyń sany 200 myńǵa jetkendigin atap ótti.
«ıAǵnı, jastar elorda halqynyń jalpy sanynyń 24 paıyzyn quraıdy. Alaıda bul resmı statıstıka kez kelgen megapolıske tán jasyryn kóshi-qon zańdylyǵyn eskermeıdi. Shyn máninde Astanada 250-300 myńǵa deıin jastar bar», - dedi Ashat Oralov.
Onyń aıtýynsha, elorda jastarynyń basym bóligin stýdentter quraıdy. Qazirgi ýaqytta elordada 14 joǵary oqý orny men 35 kolledj bar. Olarda 80 myńnan astam stýdent oqıdy.
«Osy rette aıta keterlik másele bar. 2016 jyly 14 joǵary oqý ornynda 30 jataqhana bolǵan. 2017 jyly 4 jataqhana salyndy. Biraq búgingi kúni 12 myńǵa jýyq stýdent jataqhanada tursa, 10 myń stýdentke jataqhana jetispeıdi. Buǵan qosa, 35 kolledjdiń 2200 stýdentke arnalǵan 16 jataqhanasy bar. Qajettilik áli de 3 myń oryn. Jalpy sanasaq, elordada 13 myń stýdentke jataqhana jetispeıdi», - dedi basqarma basshysy.
