1,3 mln gektar aýyl sharýashylyǵy alqaby shegirtke qarsy óńdeldi
ASTANA.KAZINFORM — Memleket basshysynyń AÓK-ti keshendi túrde damytý jáne azyq-túlik qaýipsizdigin nyǵaıtý jónindegi tapsyrmalaryn júzege asyrý sheńberinde Úkimet aýyl sharýashylyǵy alqaptaryn shegirtke zııankesterinen qorǵaý jumystaryn jalǵastyrýda. Bul týraly Úkimettiń baspasóz qyzmeti habarlady.
Aýyl sharýashylyǵy mınıstrliginiń derekteri boıynsha búgingi tańda hımııalyq óńdeý 1,3 mln gektar alqapta júrgizilgen, bul – bıylǵa mejelengen jumystardyń jalpy boljamdy kóleminiń 62%-y.
Qorǵaý is-sharalary fıtosanıtarııalyq monıtorıng nátıjeleri negizinde júzege asyrylýda. Óńdeý jumystary zııankesterdiń taralý oshaqtary anyqtalǵan jáne zııandy saldary ekonomıkalyq shegine jetken kezde júrgiziledi, bul qabyldanatyn sharalardyń tıimdiligin arttyrýǵa jáne bıýdjet qarajatyn utymdy paıdalanýǵa múmkindik beredi.
Qazirgi ýaqytta aýyl sharýashylyǵy aýmaqtaryn zertteý búkil elimiz boıynsha júrgizilip jatyr. Monıtorıng jáne qorǵaý is-sharalaryna 3,5 myńǵa jýyq maman jumyldyryldy. Barlyq óńir pestıtsıdterdiń jetkilikti qorymen jáne qajetti tehnıkalyq quraldarmen qamtamasyz etilgen.
Monıtorıng jáne óńdeý jumystaryn júrgizý úshin áýe kemeleri, 103 pılotsyz ushý apparaty jáne mamandandyrylǵan jerústi tehnıkalary paıdalanylady. Qorǵaý is-sharalaryna barlyǵy 556 birlik tehnıka jumyldyrylǵan, bul zııankesterdiń taralý oshaqtary anyqtalǵan kezde jedel den qoıýǵa jáne qajetti qorǵanys sharalaryn ýaqtyly júrgizýge múmkindik beredi.
Qazirgi ýaqytta eldegi fıtosanıtarlyq jaǵdaı turaqty ári baqylaýda. Shegirtke zııankesteriniń jappaı taralý qaýpi barynsha azaıtyldy, monıtorıng jáne qorǵaý is-sharalary shtattyq rejımde jalǵasýda.
Júrgizilip jatqan jumystar qazirdiń ózinde oń nátıje kórsetip otyr, 2025 jyldan bastap óńdeýge jatatyn alqaptardyń azaıýy baıqalady – 2,7 mln ga qamtyldy, bul 2024 jylǵy kórsetkishten 13%-ǵa az. Osy jyly boljamdy alqap 2,2 mln ga, bul 2024 jylmen salystyrǵanda 30%-ǵa az.
Zııankester sanynyń azaıýyna ósimdikterdi qorǵaý qyzmetin jetildirý sharalary aıtarlyqtaı úles qosty.
Júrgizilgen is-sharalar nátıjesinde aýyl sharýashylyǵy alqaptaryna zaqym keltirýge jol berilmedi. Qorǵaý is-sharalarynyń aıaqtalý merzimi osy jyldyń 20-shi shildesi.
Aıta ketelik Aqtóbede 424 myń gektar alqapta shegirtkege qarsy óńdeý jumystary júrgizilip jatqany týraly jazǵan edik.
