13 mıllıon gektar alqaptyń astyǵy bastyryldy

ASTANA. QazAqparat - 13 mıllıon gektar alqaptyń astyǵy bastyryldy. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR AShM Agroónerkásip keshenindegi memlekettik ınspektsııa komıtetiniń tóraǵasy Saqtash Qasenov málim etti.

Onyń atap ótýinshe, 25-26 qyrkúıekten bastap qazan aıynyń basyna deıin jańbyr úzdiksiz jaýdy. Sonyń saldary egin jınaý jumystaryna keri áserin tıgizip otyr. Degenmen, mundaı qıyndyqtarǵa qaramastan astyq bastyrý jumystary júrgizilýde.

"Biz ákimshilikten astyq bastyrý naýqanyna qatysty aqparat alyp otyramyz. Olardyń aqparatyna sáıkes, búgingi kúni 15 mln. gektar alqaptyń 13 mıllıon gektarǵa jýyq alqabynan egin jınaldy. Ortasha túsimdiligi gektaryna 12 tsentnerden aınalýda», - dedi ol.

Komıtet basshysynyń sózine qaraǵanda, 2009 jyldan bastap egistik alqaptaryn ártaraptandyrý jumystary júrgizilýde. Máselen, egistik alqaby 2009 jyly 14,8 mln. gektar bolsa, aǵymdaǵy jyly 12,4 mln. gektarǵa qysqarǵan.