13 maýsym. Týǵan kún ıeleri
ESІMDER
72 jyl buryn (1947) Qazaqstan Respýblıkasy Prezıdentiniń janyndaǵy «Rýhanı jańǵyrý» baǵdarlamasyn iske asyrý jónindegi ulttyq komıssııanyń múshesi, Qazaqstan Respýblıkasynyń eńbek sińirgen qaıratkeri, Memlekettik syılyqtyń laýreaty, aqyn, dramatýrg Nurlan Myrqasymuly ORAZALIN dúnıege keldi.
Ol Almaty oblysy, Uıǵyr aýdany, Kókbastaý aýylynda týǵan. 1965 jyly orta mektepti bitirgen soń, Qazaq memlekettik ýnıversıtetiniń fılologııa fakýltetine oqýǵa tústi.
Eńbek jolyn 1970 jyly «Qazaqstan pıoneri» (qazirgi «Ulan») gazetinde ádebı qyzmetker bolyp bastady. 1972-1984 jyldar aralyǵynda respýblıka Mádenıet mınıstrliginiń repertýarlyq-redaktsııalyq kollegııasynda redaktor, aǵa redaktor, bas redaktor qyzmetterin atqardy. 1984-1986 jyldary Respýblıkalyq qýyrshaq teatrynyń dırektory boldy. 1986 jyly Qazaqstan teatr qaıratkerleri odaǵynyń birinshi sezinde odaq basqarmasynyń birinshi hatshysy bolyp saılanyp, 1986 jyly ótken SSSR Teatr qaıratkerleri odaǵynyń birinshi sezinde basqarma quramyna endi. 1990-1993 jyldary Qazaq SSR Joǵarǵy Keńesiniń depýtaty boldy. 1993-1996 jyldary «Egemen Qazaqstan» gazetiniń bas redaktory qyzmetin atqardy. 1996 jyldan Qazaqstan Jazýshylar odaǵynyń birinshi hatshysy, basqarma tóraǵasy boldy. 2013-2016 jyldary - QR Parlamenti Senatynyń depýtaty.
2017 jyldyń sáýirinen «Rýhanı jańǵyrý» baǵdarlamasyn iske asyrý jónindegi ulttyq komıssııa múshesi.
«Qurmet» (2005), «Parasat» (2010) ordenderimen, medaldarmen marapattalǵan. Almaty qalasynyń qurmetti azamaty.
66 jyl buryn (1953) jazýshy, aýdarmashy, «Mektep»baspasynyń bas dırektory Erlan Ábenuly SATYBALDIEV dúnıege keldi.
Almaty qalasynda týǵan. M.Gorkıı atyndaǵy Ádebıet ınstıtýtynyń aýdarmashylar daıarlaıtyn bólimin aıaqtaǵan.
Respýblıkalyq «Jazýshy» baspasynda redaktor, «Jalyn» baspasynda aýdarma bóliminiń meńgerýshisi, «Inerbýk» birikken kásipornynyń, «Óner» baspasynyń dırektory, Qazaq teledıdary men radıosy respýblıkalyq korporatsııasynyń prezıdenti bolyp qyzmet atqarǵan. Qazir «Mektep» baspasynyń bas dırektory. Qazaq jazýshylarynyń shyǵarmalary men qazaq aýyz ádebıetiniń birqatar týyndylaryn orys tiline aýdarǵan.
Qazaqstan Respýblıkasynyń medaldarymen marapattalǵan.
64 jyl buryn (1955) kompozıtor, Qazaqstan Respýblıkasy Memlekettik syılyǵynyń laýreaty Balnur Balǵabekqyzy QYDYRBEK dúnıege keldi.
Almaty qalasynda týǵan. K.Baıseıitova atyndaǵy respýblıkalyq arnaýly mýzyka mektebin, Qurmanǵazy atyndaǵy Qazaq ulttyq konservatorııasyn bitirgen.
Almaty memlekettik konservatorııasynda, Qazaqstan Kompozıtorlar odaǵynda qyzmet istegen. 2007 jyldan beri «Qazaqstan kompozıtorlar qaýymdastyǵy» qoǵamdyq birlestiginiń tóraıymy, 2010 jyldan beri Eýrazııa kompozıtorlar qaýymdastyǵynyń prezıdenti.
«Qarlyǵashtyń quıryǵy nege aıyr» atty tuńǵysh ulttyq balalar baletiniń, «Qalqaman-Mamyr» opera-baletiniń, «Naýryz meıram hıkaıasy» baletiniń, sondaı-aq kóptegen sımfonııalyq poemalar men ývertıýralardyń, orkestrlik, kameralyq shyǵarmalardyń avtory. Ol - otandyq mýzyka tarıhynda tuńǵysh ret úrmeli aspaptar orkestrine arnalǵan shyǵarmalar jazǵan kompozıtor.
36 jyl buryn (1983) Qazaqstan Respýblıkasynyń ulttyq ekonomıka vıtse-mınıstri Jaslan Hasenuly MÁDIEV dúnıege kelgen.
Ol Almaty qalasynda týǵan. Ál-Farabı atyndaǵy Qazaq ulttyq ýnıversıtetin álemdik ekonomıka jáne halyqaralyq qarjy mamandyǵymen (2004); Kolýmbııa ýnıversıteti, Halyqaralyq qatynastar jáne memlekettik basqarý mektebin (Nıý-Iork, AQSh) ekonomıkalyq saıasat jónindegi ekonomıkalyq saıasat magıstri dárejesimen (2007); Massachýsets tehnologııalyq ınstıtýty, Sloýn bıznes mektebin iskerlik ákimshilik magıstri dárejesimen (Boston/Kembrıdj, AQSh) (2016) bitirgen.
Eńbek joly: «Alıans Bank» AQ-da taǵylymger (2004); «Alıans Bank» AQ mamany, jetekshi mamany, qaryzdyq kapıtal naryǵy bóliminiń bastyǵy (2004-2006); «Morgan Stanley» ınvestıtsııalyq bankiniń (London, Ulybrıtanııa) qyzmetkeri (07.2007-10.2007); «Qazyna» Turaqty damý qory» AQ qyzmetkeri, Qazaqstan Respýblıkasy Prezıdenti Ákimshiliginde qyzmet atqarǵan (2007-2008); «Samuryq-Qazyna» Ulttyq ál-aýqat qory» AQ qazynashylyq departamentiniń dırektory (2008-2009); «Kazyna Capital Management» AQ basqarma tóraǵasynyń orynbasary (2009-2010); «Qazaqstannyń damý banki» AQ basqarma tóraǵasynyń orynbasary (2010-2014); Qazaqstan Respýblıkasy Ulttyq banki dırektorynyń orynbasary (2014-2015); Qazaqstan Respýblıkasy Premer-Mınıstriniń keńesshisi (08.2016-10.2016); «Qazaqstan temir joly» Ulttyq kompanııasy» AQ basqarma tóraǵasynyń qarjy jónindegi orynbasary (2017-2019).
Qazirgi laýazymyn 2019 jylǵy sáýir aıynan beri atqaryp keledi.
26 jyl buryn (1993-2018) qazaqstandyq mánerlep syrǵanaýshy Denıs TEN dúnıege keldi.
Almaty qalasynda týǵan. Denıs - Koreı ımperııasy kezinde dańqty qolbasshy bolǵan general Mın Gynhonyń urpaǵy. Mánerlep syrǵanaýdan bólek, tennıs, akrobatıka, taekvondo, karate, júzýmen aınalysyp, bı jáne sýret salý mektebine barǵan. Mýzyka mektebinde 5-synypty támamdap, horǵa qatysqan. 2002 jyly Denıs Ten qatysqan hor ujymy Pýsandaǵy Hor Olımpıadasynda kúmis medal ıelendi. Keıinnen mánerlep syrǵanaýmen aınalysýǵa birjola den qoıdy. 2003 jyly "Hrýstalnyı konek" týrnırinde ony Elena Býıanova (Vodorezova) baıqap, Máskeýge óziniń qol astynda jattyǵýǵa shaqyrady. Ten eresek sportshylarmen jarysyp, 2006 jylǵy Qazaqstan chempıonatyn jeńedi. Biraq, halyqaralyq deńgeıde tek kelesi jyldan bastap kórine bastady, oǵan Halyqaralyq konkımen syrǵanaýshylar odaǵynyń jas shekteýleri (13 jas) sebep boldy.
Sporttaǵy jetistikteri: Ol - 2014 jyly mánerlep syrǵanaýdan Sochı Olımpıadasynyń qola júldegeri, 2013 jylǵy álem chempıonatynyń kúmis júldegeri, VІІ qysqy Azııa oıyndarynyń chempıony, 28-shi qysqy Ýnıversıadanyń (Almaty-2017) chempıony, Qazaqstannyń úsh dúrkin chempıony. Qazaqstan Respýblıkasynyń halyqaralyq dárejedegi sport sheberi.