«13 kılometr» derekti fılmi Brazılııadan júldeli oraldy
ASTANA. QazAqparat - «13 kılometr» derekti fılmi Brazılııada qazannyń 23-29 aralyǵynda ótken Halyqaralyq «Eńserý» kınofestıvalinde arnaıy júldege ıe boldy. Fılmdi QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ túsirgen. Fılmniń rejısseri - Vladımır Tıýlkın, dep habarlaıdy Sháken Aımanov atyndaǵy «QAZAQFILЬM» aktsıonerlik qoǵamynyń baspasóz qyzmeti.
Jaqynda ǵana Reseıde ótken derekti fılmder festıvalinde arnaıy júldege ıe bolǵan «13 kılometr» derekti fılmi Serik Bodanbaev esimdi zaǵıp týraly baıandaıdy. Fılmniń keıipkeri óziniń shydamdylyǵy men tabandylyǵynyń arqasynda úlken sharýa qojalyǵynyń ıesi bolyp otyr.
«Bul fılmde basyna túsken qıyndyqtardy eńserip, dittegen maqsatyna jete bilgen er azamattyń taǵdyry sýretteledi. Fılm túrli festıvalderge qatysyp, júldeli oryndardan kórinip jatqanyna óte qýanyshtymyn», - dedi fılmniń rejısseri.
Festıvaldiń bas júldesi - «Sheteldiń úzdik fılmi» júldesin rejısser Roman Hrýştyń «Pechorın» fılmi ıemdendi. «Eń úzdik akter» atalymy «Mýss» (rejısseri Djon Hellberg) kartınasynda somdaǵan Stefan Bertolaǵa berildi, al «Úzdik derekti fılm» júldesimen Klavdııa Bershadskaıa túsirgen reseılik «Ushý» fılmi marapattaldy. «Eń úzdik qysqa metrajdy fılm» júldesi «Tynysh bala» fılmine buıyrdy.
