13 qazanda elimizdiń birqatar óńirinde jańbyr men qar jaýady
ASTANA. KAZINFORM – «Qazgıdromet» RMK sınoptıkteri 13 qazanǵa arnalǵan aýa raıy boljamyn jarııalady.
Aýqymdy antıtsıklonnyń áserinen Qazaqstannyń basym bóliginde jyly, kóbinese jaýyn-shashynsyz aýa raıy saqtalady.
Tek elimizdiń ońtústigi men shyǵysynda atmosferalyq fronttardyń ótýine baılanysty jaýyn-shashyn, jańbyr men qar kútiledi.
Respýblıka boıynsha jel kúsheıedi. Soltústik, ońtústik jáne shyǵys óńirlerde tuman tússe, batysta shańdy daýyl soǵady.
Atyraý oblysynda, Mańǵystaý oblysynyń ortalyǵynda, Batys Qazaqstan oblysynyń batysynda, ońtústigi men shyǵysynda, Aqtóbe oblysynyń shyǵysynda, Jetisý oblysynyń shyǵysynda, Qyzylorda oblysynyń soltústigi men ortalyǵynda, Qostanaı oblysynyń ońtústiginde joǵary órt qaýpi saqtalady.
Al Qyzylorda oblysynda, Aqtóbe oblysynyń batysynda, ońtústigi men ortalyǵynda, Atyraý oblysynyń ońtústiginde, Qaraǵandy oblysynyń batysynda, Ulytaý oblysynyń batysynda, ońtústigi men ortalyǵynda tótenshe órt qaýpi kútiledi.
Aıta keteıik, buǵan deıin sınoptıkter 13-15 qazan aralyǵynda elimizdiń birqatar óńirinde jańbyr aralas qar jaýyp, aýa temperatýrasy tómendeıtinin eskertken bolatyn. 15 qazanda soltústik pen shyǵysta kóktaıǵaq bolýy múmkin.
