13 qazan kúni Nur-Sultanda ótetin mańyzdy sharalar ańdatpasy

NUR-SULTAN

09.00-de Úkimet úıinde Úkimet otyrysy ótedi. Kún tártibinde 2020 jylǵy qańtar-qyrkúıektegi QR áleýmettik-ekonomıkalyq damý qorytyndysy jáne respýblıkalyq bıýdjettiń atqarylýy, Qazaqstan Respýblıkasynyń 2020-2024 jyldarǵa arnalǵan áleýmettik-ekonomıkalyq damý boljamy jáne 2020-2022 jyldarǵa arnalǵan respýblıkalyq bıýdjetti naqtylaý qaralady. Úkimet otyrysy PrimeMinister.kz saıtynda jáne áleýmettik jelilerdegi resmı akkaýnttarda onlaın rejımde kórsetiledi.

10.00-de A. Baraev atyndaǵy Astyq sharýashylyǵy ǵylymı-óndiristik ortalyǵynda «Aýyl» partııasy tóraǵasynyń orynbasary Q.Q. Aıtýǵanovtyń partııa basshylyǵymen jáne múshelerimen «Aýyldyq aýmaqtardy áleýmettik-ekonomıkalyq damytýdyń jaı-kúıi jáne olardy teńgerimdi damytýdyń perspektıvalary» taqyrybynda kezdesýi ótedi.

10.30-da QR Prezıdenti janyndaǵy Ortalyq kommýnıkatsııalar qyzmetinde jeke qosalqy sharýashylyqtarda qustardyń qyrylýyn toqtatý jáne ótemaqy tóleýdiń bastalýy týraly baspasóz konferentsııasy ótedi. Spıkerler: QR AShM Veterınarlyq baqylaý jáne qadaǵalaý komıteti tóraǵasynyń mindetin atqarýshy Tursyn Qabdoldanov, QR AShM veterınarlyq, fıtosanıtarlyq jáne azyq-túlik qaýipsizdigi departamentiniń dırektory Gúljan Nurtazına.

11.00-de Nur-Sultan qalasy ákimdiginiń baspasóz ortalyǵynda «Meıirimdilik kerýeni - 2020» III respýblıkalyq baıqaýyn júzege asyrý» taqyrybynda onlaın baspasóz máslıhaty ótedi. Tikeleı efır Nur-Sultan qalasy ákimdiginiń Facebook-paraqshasynda uıymdastyrylady.

11.00-de Nur-Sultan qalalyq Polıtsııa departamenti janynda elordadaǵy ınternet-alaıaqtyqtyń jańa túrlerine qatysty brıfıng ótedi.

15.00-de QR Memlekettik qyzmet isteri agenttiginde Memleket basshysy qol qoıǵan «Qazaqstan Respýblıkasynyń keıbir zańnamalyq aktilerine memlekettik qyzmet jáne sybaılas jemqorlyqqa qarsy is-qımyl máseleleri boıynsha» Zań jobasyn túsindirý boıynsha baspasóz konferentsııasy ótedi.