13 eldiń ókilderi Almatyda sporttaǵy dopıng máselesin talqylaýda
ASTANA. QazAqparat - Almatyda medıtsınalyq-bıologııalyq jabdyqtaý, antıdopıng qyzmeti men sportshylardy joǵary deńgeıde daıyndaý máselelerin earnalǵan І respýblıkalyq semınar ótýde, dep habarlaıdy QazAqparat tilshisi UOK-niń baspasóz qyzmetine silteme jasap.
Semınardy QR Mádenıet jáne sport mınıstrliginiń qoldaýymen jáne «Olımpıadalyq yntymaqtastyq» baǵdarlamasy aıasynda Qazaqstan Ulttyq Olımpıada komıteti uıymdastyrýda.
Atap ótilgendeı, QR UOK prezıdenti Tımýr Qulybaev sportta joǵary nátıjege jetý úshin medıtsına-bıologııalyq jabdyqtaýdy jetildirý, antıdopıng qyzmetiniń jumysyn jaqsartý men sporttaǵy tyıym salynǵan dári-dármekterge qarsy jumysty nyǵaıtý kerek ekenin únemi aıtýda. Atalmysh semınar atalǵan máselelerdi talqylaý maqsatynda uıymdastyryldy.
«Qazaqstan UOK prezıdenti Tımýr Qulybaev dopıngke qatysty qatań saıasat júrgizýde. Rıo Olımpıadasy aldynda biz sportshylarymyzdyń analızderin Drezdendegi antıdopıngtik laboratorııaǵa jibergenbiz. Phenchhan Olımpıadasy aldynda da sóıttik. Qazirgi tańda bizdiń nátıjelerimiz jaqsy. Ary qaraı da sportshylarymyzǵa jaqsy medıtsınalyq qyzmet kórsetip, dopıngten aýlaq ustaýǵa atsalysamyz. Qazaqstan UOK jumysy otandyq sportty damytýǵa baǵyttalǵan, bizdiń basty maqsat - jas sportshylarymyzǵa durys jol kórsetý», - dedi Ulttyq Olımpıada komıtetiniń bas hatshysy Danııar Abýlǵazın.
Semınarǵa Germanııa, AQSh, Chehııa, Vengrııa jáne TMD elderinen tájirıbeli mamandar shaqyryldy.
«Búgingi semınar sportty joǵary deńgeıge kóterýdegi joldardyń biri. Bul jıynǵa Olımpıada menedjementiniń ókilderi, densaýlyq saqtaý ókilderi, sport medıtsınasyna qatysty mamandar jınaldy. Mundaı bir top mamandardyń bir jerde jınalyp, tájirıbe almasýy - ózindik Olımpıada damý júıesiniń qurýyna kóp yqpal etedi. Sondyqtan bul semınar mańyzdy dep aıtýǵa bolady», - dedi professor Vladımır Platonov.
Olar eki kúni boıy qazaqstandyq áriptesterimen tájirıbe almasady. Semınar barysynda antıdopıngtik baǵdarlarmalarǵa kóp kóńil bólinedi.
300-ge jýyq qatysýshylar (ulttyq sport medıtsına men antıdopıng federatsııasynyń ókilderi, ǵylymı-jıyntyq toptardyń mamandary, dene shynyqtyrý men sport basqarmasynyń basshylary, oblystyq saýyqtyrý dıspanserlerdiń mamandary, medıtsına men bilim uıymdardyń ókilderi) eki sektsııaǵa bólindi. Onyń bireýi sport dárigerlerine arnalsa, ekinshisi qazaqstandyq bapkerlerge arnalǵan «Zamanaýı sport jattyǵýlary» máselesin qarastyrdy. Semınar búginde jalǵasyn tabady.
Illıýstratsııalyq foto
