13 adamnyń ólimi: Jertólede ornalasqan Almaty hostelinde kóbine sheteldikter turǵan

Almatyda órtke oranǵan hostelden evakýatsııalanǵan adamdardyń basym bóligi shetel azamattary, dep habarlaıdy Kazinform.

Almaty qalalyq Tótenshe jaǵdaılar departamentiniń basshysy Nurlan Atyǵaevtyń aıtýynsha, evakýatsııalanǵan adamdardyń kóbi sheteldikter.

«Hostel ákimshiliginiń sózinshe, óz betimen syrtqa shyqqan adamdardyń deni Ózbekstan, Qyrǵyzstan, Pákistan elderiniń azamattary. Aralarynda qazaqstandyqtar da bar. Qaza tapqandardyń kim ekeni anyqtalyp jatyr», — dedi ol.

Sonymen qatar departament basshysy órtke oranǵan hosteldiń ashylǵanyna bir jarym aı bolǵanyn málim etti. 

«Úsh qabatty ǵımarattyń jertólesinen hostel ashqan. Bul, negizi, zańǵa qaıshy. Sebebi jertóle adam turýǵa arnalmaǵan. Qansha jerden jabdyqtalsa da», — dedi Nurlan Atyǵaev.

Belgili bolǵanyndaı, Astanadan QR Tótenshe jaǵdaılar mınıstri Syrym Sháriphanov ushyp shyqty.

Eske salaıyq, búgin megapolıste hostel órtenip, 13 adam qaza tapty.

Dárigerler órtten zardap shekken 2 adamǵa kómek kórsetti. Olar aýrýhanaǵa jetkizilip, keıin ambýlatorlyq em qabyldaý úshin úılerine jiberildi.

Oqıǵa ornynan 59 adam evakýatsııalanyp, 56-sy jaqyn mańdaǵy mektepke ýaqytsha ornalastyryldy.