13,5 tonna dızel otynyn zańsyz tasymaldaǵan júrgizýshi ustaldy
NUR-SULTAN. QazAqparat – Almaty oblysynda 13,5 tonna ilespe qujatsyz dızel otynyn tasymaldaǵan kólik júrgizýshisi ustaldy, dep habarlaıdy QazAqparat tilshisi.
«Birlesken is-sharalar barysynda Qarasaı aýdandyq memlekettik kirister basqarmasynyń, Almaty oblystyq melekettik kirister jáne ekonomıkalyq tergeýler departamentteriniń qyzmetkerleri munaı ónimderin zańsyz tasymaldaý men aınalymynyń jolyn kesý maqsatynda aýdan aýmaǵynda reıdtik is-sharalar júrgizdi. Shara barysynda Qarasaı aýdanynyń Kóksaı aýylynda jalpy somasy 1 266 300 teńgege 13,5 tonna dızel otynyn ilespe qujatsyz tasymaldaǵan tirkemesi bar ZıL markaly avtokólik ustaldy», - delingen QR QM Memlekettik kirister komıteti taratqan aqparatta.
Vedomstvo málimetinshe, qazirgi ýaqytta ákimshilik zańnamaǵa sáıkes kináli tulǵalardy jaýapkershilikke tartý máselesi sheshilip jatyr. Ákimshilik quqyq buzýshylyq týraly hattama jasalyp, materıaldar Qarasaı aýdanynyń mamandandyrylǵan aýdanaralyq ákimshilik sotyna jiberilgen.
