127 el plastıkten jasalǵan ónimderdi paıdalanýǵa shekteý qoıdy - BUU
ASTANA. QazAqparat - 2018 jyly 127 el plastıkten jasalǵan bir rettik ónimderdi paıdalanýǵa shekteý qoıdy, 30 elde plastmassa paketterdi paıdalanýǵa tólem engizildi, taǵy 27 elde qorshaǵan ortaǵa zııandy materıaldarǵa múlde tyıym salyndy. Bul týraly BUU Qorshaǵan ortany qorǵaý baǵdarlamasynyń (ıÝNEP) esebinde aıtyldy, dep habarlaıdy QazAqparat.
«2018 jyl shıelenisken jaǵdaılarǵa toly boldy, degenmen álemde bıznesti ekologııalyq problemalardy sheshetindeı etip júrgizýge umtylys baıqalady», - deıdi ıÝNEP basshysynyń mindetin atqarýshy Djoıs Msýıa.
Msýıa hanymnyń aıtýynsha, bul rette BUU-nyń róli orasan zor. Keleli kelissózderdiń arqasynda qol jetkizilgen nátıjeler de barshylyq. Atap aıtqanda, Úndistan 2022 jylǵa qaraı plastmassadan jasalǵan ónimderden tolyqtaı bas tartýdy óz mindetine alyp otyr.
Jyl saıyn álemde 1,3 mlrd tonna azyq-túlik ónimderi qoqysqa shyǵarylady. ıÝNEP óte qarapaıym sharalardyń kómegimen, máselen, azyq-túlik ónimderin saqtaý sharttaryn ózgertý arqyly qoqys kólemin qysqartýdy usynyp otyr.
ıÝNEP-tiń baıandamasynda, budan tys, ǵımarattardy jylytý men salqyndatýdyń ekologııalyq ádisteri, janýarlardyń joıylyp bara jatqan túrlerin jáne bıo áralýandyqty saqtap qalý sharalary, ozon qabatyn qorǵaý, t.b. máseleler aıtylady.
Eske sala keteıik, buǵan deıin 2019 jyldyń basynan Ońtústik Koreıa bıligi tabıǵı resýrstardy saqtaý jáne qoqysty azaıtý maqsatynda sýpermarketterde polıetılen paketterdi paıdalanýǵa tyıym salǵanyn habarlaǵan bolatynbyz.
