12,6 mlrd teńge qaıtarylǵan aktıv: Aqmola oblysynda sport kesheni ashyldy
ASTANA. KAZINFORM — Aqmola oblysynda qaıtarylǵan aktıvter esebinen 12 mlrd teńgege Kokshe Arena kópfýnktsıonaldy sport kesheni salyndy. Bul týraly Úkimettiń baspasóz qyzmeti málim etti.
Memleket basshysynyń 2025 jylǵy naýryzda Ulttyq quryltaıdyń IV otyrysynda bergen tapsyrmasyn oryndaý aıasynda Kókshetaýda Kokshe Arena zamanaýı kópfýnktsıonaldy sport kesheniniń ashylýy ótti. Nysan Arnaýly memlekettik qor qarajaty esebinen turǵyzyldy. Bul maqsatqa Úkimet 12,6 mlrd teńge bóldi.
— Ǵımarattyń syıymdylyǵy shamamen 1 myń adamdy quraıdy. Keshende zamanaýı mýltımedııalyq júıeleri bar 650 oryndyq kórermen zaly, órmeleý alańy men órt-qoldanbaly sport túrlerine arnalǵan munarasy bar ámbebap sport zaly qarastyrylǵan. Boks, kúres, aýyr atletıka jáne krossfıt zaldary sertıfıkattalǵan olımpıadalyq standarttaǵy quraldarmen jabdyqtalǵan. Halyqtyń mobıldiligi tómen toptary úshin de barlyq jaǵdaı jasalǵan, — delingen habarlamada.
Іrgeles aýmaqta jeńil atletıka aımaǵy, oıyn sport túrleri men laqtyrý pánderine arnalǵan alańdar, sondaı-aq demalys aımaqtary jabdyqtalǵan.
Saltanatty ashylý rásimine Qazaqstan Respýblıkasynyń Bas prokýrory Berik Asylov, týrızm jáne sport mınıstri Erbol Myrzabosynov, qarjy mınıstri Mádı Takıev, Aqmola oblysynyń ákimi Marat Ahmetjanov qatysty. Іs-sharanyń qurmetti qonaqtary World Boxing halyqaralyq federatsııasynyń prezıdenti Gennadıı Golovkın, UFC aıasynda óner kórsetetin aralas jekpe-jek sheberi Shavkat Rahmonov boldy.
Aıta ketý kerek, Kokshe Arena — qaıtarylǵan aktıvter qarajaty esebinen salynǵan aımaqtaǵy ekinshi sporttyq ınfraqurylym nysany. Buǵan deıin oblysta Zerendi aýylynda balalar men jasóspirimderge arnalǵan sport mektebi ashylǵan bolatyn.
Aqmola oblysynda Arnaýly memlekettik qordyń qarajatyna barlyǵy 42 áleýmettik nysan, onyń ishinde 14 densaýlyq saqtaý mekemesi, 26 sýmen jabdyqtaý nysany jáne 2 sport mekemesiniń qurylysy josparlanǵan.
Eske sala keteıik, buǵan deıin SQO-daǵy Birlik aýylyna qaıtarylǵan aktıvter esebinen aýyz sý tartylǵan edi.