12,6 mln saılaýshy tizimge engizildi - OSK
ASTANA. KAZINFORM – Jalpy elimiz boıynsha 12 mln 600 myńnan astam saılaýshy tirkeldi. Bul týraly OSK múshesi Azamat Aımanakýmov málim etti.
- Jalpy, saılaýshylardyń tizimin qalyptastyrý Ortalyq saılaý komıssııasynyń 1 shildedegi alǵashqy otyrysynda berilgen qaýlysyna sáıkes júzege asty. Jergilikti atqarýshy organdar 2 tamyzda, ıaǵnı daýys berýge 20 kún qalǵanda saılaýshylardyń tizimin saılaý komıssııalaryna usyndy. Keshe barlyq aktilerdi jınaqtadyq. Búgin jergilikti atqarýshy organdardyń ókilderi osy derekterdi jarııalady. Jıyntyq aqparatqa qaraǵanda, 12 mln 605 myń 788 saılaýshy tizimge engizilgen, - dedi A.Aımanakýmov Ortalyq saılaý komıssııasynyń otyrysynda.
Onyń aıtýynsha, eń kóp saılaýshy Astana men Almaty qalalarynda, Almaty jáne Túrkistan oblystarynda tirkeldi. Budan bólek ol daýys berý quqyǵyna arnalǵan esepten shyǵarý kýálikterin daýys berý kúnine 15 kún qalǵan ýaqyttan bastap daýys berý kúniniń aldyndaǵy kúngi saǵat 18:00-ge deıin alýǵa bolady. Mundaı kýálikti ýchaskelik saılaý komıssııasy saılaýshynyń jazbasha ótinishi jáne jeke basyn kýálandyratyn qujatyn kórsetýi negizinde beredi. Bul rette saılaýshylar tizimine tıisti belgi qoıylady.
- Azamattar turǵylyqty jeri boıynsha tirkelgen ýchaskelik saılaý komıssııasynan 7 tamyzdan bastap 22 tamyz saǵat 18:00-ge deıin daýys berý quqyǵyna arnalǵan esepten shyǵarý kýálikterin alýǵa quqyly. Bul rette bir eldimeken shegindegi basqa saılaý ýchaskesinde daýys bergisi keletin saılaýshylarǵa mundaı kýálik berilmeıtinin atap ótken jón. Joǵalǵan esepten shyǵarý kýálikteri qalpyna keltirilmeıdi jáne olardyń telnusqalary berilmeıdi, - dedi Azamat Aımanakýmov.
Budan buryn habarlanǵandaı, el aýmaǵynda ýchaskelik saılaý komıssııalary jumysyna kiristi.
