1242 eldi meken baqylaýda: Bıyl qaı óńirlerde sý tasqyny kaýpi bar

ASTANA. KAZINFORM — Bıyl elimizdiń 5 óńirinde sý tasqyny qaýpi joǵary. Bul týraly Tótenshe jaǵdaılar mınıstrliginiń mamany Jibek Joly telearnasynyń «Búgin LIVE» baǵdarlamasyna bergen suhbatynda málimdedi.

– Qazgıdromettiń aqpan aıyna berilgen aldyn ala boljamy boıynsha 5 oblys basty nazarda tur. Olar: ShQO, SQO, Qaraǵandy, Aqmola jáne Abaı oblystary. Osy óńirlerde sý tasý qaýpi boıynsha táýekelder bar. Al kelesi aldyn ala boljam naýryzda beriledi. Soǵan qaraı qandaı jumystar atqarý kerektigi belgili bolady, - deıdi QR TJM Tótenshe jaǵdaılardyń aldyn alý komıtetiniń bas mamany Erasyl Kádirbekov.

Stýdııa qonaǵy sý tasqynyna áser etetin negizgi faktorlarǵa toqtaldy.

– Bul aımaqtardaǵy sý tasý qaýpiniń joǵary bolýyna jan-jaqty faktorlar áser etedi. Qardyń qalyńdyǵy, jerdiń betinde muz qatýy, sondaı-aq ózge de gıdrometeorologııalyq máseleler esepke alyndy. Qazir «bıyl elimizde sý tasqyny bolmaıdy» dep tolyqtaı aıtýǵa kelmeıdi. Sebebi bári aldaǵy ýaqytta aýa raıyna baılanysty. Eger kún birqalypty jylyp, sýdyń bári óz retimen ketip qalsa, esh qorqynysh joq. Biraq kún kúrt jylyp ketýi de múmkin. Ázirge daıyndyqtar josparǵa saı júrip jatyr, – deıdi ol.

Mınıstrlik ókili elimizde sý tasý qaýipi bar 1242 eldi meken baryn aıtady.

– Jalpy, QR zańnamasyna sáıkes, sý tasqynynyń aldyn alý jumystary men oǵan bıýdjet bólý jergilikti atqarýshy organdardyń mindeti. Olardyń málimetine sáıkes, tıisti jumystardyń bári atqarylǵan. Al TJ mınıstrligi bul baǵyttaǵy jumystardy nyǵaıtý jáne baǵyt berý boıynsha birlesip áreket etip jatyr. 2025 jylǵy sý tasqynynyń qorytyndysyna sáıkes, basty nazarda turǵan 1242 eldi meken bar. Sý tasqynynyń aldyn alý sharalarynyń ýaqytyly atqarylýy sebepti 736 eldi mekendegi qaýip barynsha azaıtylyp, 234 eldi mekende qaýip tolyq seıilip, qazirgi tańda 272 aýyl nazarda tur, – deıdi Erasyl Kádirbekov.

Al ońtústik óńirlerde jaýǵan qardyń kólemi asa kóp emes.

– Ol jaqtaǵy sý qoımalary sý jınaý rejıminde jumys istep jatyr. ıAǵnı kóktemgi sýǵarý kezeńine daıyndyq bastalǵan. Atap aıtar bolsaq, ońtústiktegi Shardara, Jambyl oblysyndaǵy Tasótkel, Almaty oblysyndaǵy Qapshaǵaı sý qoımalary. Bul kelip túsken sýdy sý qoımalarynda saqtaý degen sóz, – deıdi QR Sý resýrstary jáne ırrıgatsııa mınıstrliginiń ókili Erlan Jumabaev.

Mınıstrlik mamany elimizdegi sý qoımalary sý tasqynyń aldyn alýǵa daıyn ekenin jetkizdi.

– Qazir sý qoımalarynyń tolýy soltústik óńirlerde orta eseppen alǵanda 68 paıyz, batys óńirlerde – 50 paıyz, ortalyqta – 68 paıyz, al shyǵysta 85 paıyzǵa jetip otyr. Barlyq óńirdegi sý qoımalarynda sý tasqynynyń aldyn alý maqsatynda boljamǵa sáıkes bos keńistikter daıyn tur. Oǵan qosa, mamandar shtattyq rejımde jumys istep, bárin baqylaýǵa alyp otyr. 1 naýryzda Qazgıdromettiń aldyn ala boljamy shyqqan soń, qaıta túzetýler engiziledi. Nátıjeler ár 10 kún saıyn jańaryp otyrady, – deıdi QR SRIM ókili.

Aıta keteıik, Sý resýrstary jáne ırrıgatsııa birinshi vıtse-mınıstri Nurlan Aldamjarov sý tasqyny qaýpi qaı óńirlerde bar ekenin, aldyn alý úshin qandaı sharalar qolǵa alynǵanyn aıtyp berdi.