124 myń teńge: JOO túlekteri arasynda eń tómengi jalaqyny Shymkent jastary alyp júr
«2022 jylǵy reıtıngte 2021 jyldyń 81 393 túlegi boıynsha derekter taldandy. Taldaý boıynsha 9 287 adam magıstratýrada oqýyn jalǵastyrǵan, 3688 adam bala kútimi boıynsha demalysqa shyqqan, 254 adam oqýdy bitirgen soń áskerı boryshyn ótegen. Júrgizilgen saraptamaǵa sáıkes, 6756 túlektiń jasy 29-dan asqan jáne 940 túlek – shetel azamaty», - dedi «Atameken» ulttyq kásipkerler palatasynyń basqarýshy dırektory Azamat Beısenbenov Ortalyq kommýnıkatsııalar qyzmetinde ótken baspasóz máslıhatynda.
Túlekterdiń jumysqa ornalasýyn taldaý kezinde olardyń 2021 jyldyń tamyzy men 2022 jyldyń shildesi aralyǵyndaǵy aı saıynǵy zeınetaqy aýdarymdary taldanǵan.
«Ótken jyldarmen salystyrǵanda 2022 jylǵy reıtıngtegi jumysqa ornalasýdyń ortasha paıyzy 1,8%-ǵa artyq, mysaly, 2020 jyly túlekterdiń ortasha jumysqa ornalasý deńgeıi – 71%, 2021 jyly – 77% qurap, 2022 jyly – 79 paıyzǵa deıin ósti. 79 paıyzdyń 12 paıyzy shartty, al 67 paıyzy – turaqty túrde jumys isteıtini anyqtaldy», - dedi spıker.
Batys Qazaqstan oblysynyń túlekteri jumysqa ornalasý kórsetkishi boıynsha 86 paıyzdy kórsetken, ekinshi orynda – Almaty oblysynyń túlekteri (85 paıyz), al úshinshi orynda – Atyraý oblysynyń túlekteri tur (84 paıyz).
Al eń tómen jumysqa ornalasý deńgeıi Qyzylorda jáne Túrkistan oblystary boıynsha anyqtaldy, onda bul kórsetkish 73 paıyzdy quraıdy.
«Eń joǵary jalaqyny Almaty oblysynyń túlekteri alatyny anyqtaldy, oblys boıynsha túlekterdiń oqý bitirgennen keıingi alǵashqy jyldaǵy medıandyq jalaqysy 196 769 teńgeni quraǵan. Eń tómen jalaqy Shymkent qalasy túlekterinde – 124 895 teńge», - dedi A. Beısenbenov.
Aıta keteıik, QR Ǵylym jáne Joǵary bilim mınıstrligi eldegi JOO-lardyń 2022 jylǵy reıtıngin jarııalady. Bul reıtıngke sáıkes, jumys berýshiler otandyq bilimge 67% qanaǵattanady.
Reıtıng nátıjelerimen Ǵylym mınıstrliginiń jáne «Atameken» UKP resmı saıtynda tolyǵyraq tanysýǵa bolady.
