«123456» álemdegi eń kóp qoldanylatyn qupııa sóz retinde qalýda
ASTANA. QazAqparat - Keeper Security kompanııasynyń mamandary álemdegi eń kóp qoldanylatyn qupııa sóz qaıtadan «123456» sandar tizbesi bolǵanyn anyqtady, dep habarlaıdy QazAqparat Lenta.rý-ǵa silteme jasap.
Sarapshylar 2016 jyly qupııa aqparattardyń buzylyp, jarııa etilgen iri jaǵdaılaryna taldaý jasady. Anyqtalǵandaı, «123456» jasyryn sózin ınternetti qoldanýshylardyń 17 paıyzǵa jýyǵy qoldanady eken. Bir jylda qupııa sózderdiń buzylýynan barlyǵy 10 mln.-nan astam adam zardap shekti.
Eń kóp qoldanylatyn kombınatsııalardyń qataryna sondaı-aq, «123456789», «qwerty», «12345678», «111111», «password», «123123», «123321», «google», «987654321» jáne «666666» kiredi.
Mamandardyń aıtýynsha, osyndaı qupııa sózderdiń arqasynda alaıaqtarǵa kóp bas qatyrýdyń qajeti de bolmaıdy.
