1200 qazaqstandyq áskerı qyzmetshi shartty zańsyz áskerı quralymdy joıdy (FOTO)
Birlesken oqý-jattyǵý «Shyǵys» óńirlik qolbasshylyǵynyń «Izendi» polıgonynda ótti, dep habarlaıdy QR Qorǵanys mınıstrliginiń baspasóz qyzmeti.
Stsenarıı boıynsha shartty zańsyz áskerı quralym memlekettik shekarany buzdy jáne zańsyz el aýmaǵyna basa- kóktep kirdi. Qylmystyq toptyń bir bóligi shekarashylardy ustap, qalǵandary qorǵanysty buzyp ótti jáne alǵa qaraı ilgeriledi. Osy sátte oqý-jattyǵýǵa avıatsııa qosyldy. Ushqyshtar zańsyz toptasýdyń ornalasqan ornyn belgiledi jáne avıasoqqylardy júzege asyrdy. Oqıǵa ornyna kelip jetken shabýyldyq top zańsyz áskerı quralymdy joıý boıynsha sońǵy is-qımyldardy júrgizdi. Jalpy, áskerı qyzmetshiler qoıylǵan jaýyngerlik tapsyrmany sátti oryndady jáne ózderiniń jaýyngerlik ázirligin rastady. Búginnen bastap jaýyngerler jaıaý júris tártibinde ózderiniń udaıy ornalasý oryndaryna qaıtady. Oqý-jattyǵý «Shyǵys» ÓńQ áskerleriniń qolbasshysy general-maıor Murat Bektanovtyń basshylyq etýimen ótti. Áskerı jıynǵa qatysý úshin baılanys batalonynyń áskerı qyzmetshileri, materıaldyq-tehnıkalyq qamtamasyz etý polki, 32355-K áskerı bóliminiń shtabtyq rotasy tartyldy.