1200 eldi mekendi sý basý qaýpi bar. Tasqynnyń aldyn alý úshin ne istelip jatyr
ASTANA. KAZINFORM — Búgingi tańda elimizde sý basý qaýpi bar aımaqtarda 1 223 eldi meken bar. TJ mınıstri Shyńǵys Árinov apattyń aldyn alý úshin qandaı jumystar qolǵa alynǵanyn aıtyp berdi.
Onyń aıtýynsha, tótenshe jaǵdaılardyń aldyn alý jónindegi negizgi is-sharalar ortalyq jáne jergilikti atqarýshy organdarǵa júktelgen.
— Sý tasqyny aıaqtalǵan soń óńirler aldyn alý sharalary men ınjenerlik jumystardy bastady. Jalpy óńirlerde 1 400 sý tasqynyna qarsy is-sharalar iske asyryldy. Mysaly eldi mekenderdi qorǵaý úshin 576 kılometr qorǵanysh bógetteri men bilikteri salyndy. 164 kılometr drenaj júıesi jóndeldi jáne salyndy, 960 avtomobıl jáne temir joldardyń astyna sý ótkizý qurylystary ornatyldy jáne aýystyryldy, 658 kılometr kanaldar men aryqtar quryldy, — dedi Sh. Árinov Senatta ótken Úkimet saǵatynda.
74 ózenniń qaýipti ýchaskesinde 300 shaqyrymnan astam tereńdetý men jaǵalaýdy nyǵaıtý, 190 shaqyrym tazartý jumystary júrgizildi.
Eldi mekenderdiń ishinde jańbyr men drenaj júıeleri jóndelip, salynýda. Sondaı-aq eldi mekenderden qar shyǵarý úshin qaýipsiz polıgondar aldyn ala anyqtalǵan.
Prezıdent tapsyrmasymen mınıstrlik qaramaǵynda Tótenshe jaǵdaılardyń aldyn alý komıteti quryldy. Bul bólimshe tabıǵı jáne tehnogendik sıpattaǵy tótenshe jaǵdaılardyń aldyn alý sharalarynyń oryndalýyn baqylaıdy.
— Mınıstrlik yqtımal sý tasqynyn joıý tásilin qaıta qarady. Birinshi kezekte, biz qaýipti ýchaskelerge monıtorıng júrgizip, tóngen qaterge dereý den qoıamyz. Bul tájirıbe órt qaýipti kezeńde qoldanylǵan bolatyn jáne tıimdiligin kórsetti. Osylaısha Strategııalyq josparlaý jáne shuǵyl basqarý komandalyq ortalyǵy quryldy. Onyń negizinde tehnogendik jáne tabıǵı apattardy boljaý, modeldeý jáne taldaý úshin birqatar tsıfrlyq servıs biriktirildi. Olardyń biri sý tasqynyn boljaý jáne modeldeý júıesi — «TASQYN». Bul júıe sý shyǵyndarynyń jáne ózenderdiń deńgeıi uzaq jáne qysqa merzimdi kezeńge boljam bere alady, — dedi spıker.
Sý tasqynyn modeldeý nátıjeleriniń dáldigi men durystyǵy Qazgıdromet boljamyna jáne sý qoımalarynan sýdy aǵyzý boıynsha Qazsýshar usynǵan derekterge, sondaı-aq jergilikti jer bederiniń tsıfrlyq modeliniń ózekti derekteri men batımetrııaǵa baılanysty bolady. Mamandar men múddeli memlekettik organdar kún saıyn qar deńgeıi, ózenderdiń jaı-kúıi jáne aýa raıy jaǵdaılary týraly derekterdi taldaıdy.
Buǵan deıin Senat tóraǵasynyń orynbasary Jaqyp Asanov jyl saıyn tasqynnyń sebebimen emes, tek saldarymen kúrese bersek, eshqandaı bıýdjettiń aqshasy jetpeıtinin aıtqan edi.
Aıta keteıik, elimizdiń 4 mınıstrligi birlesip, sý tasqynyn boljaýǵa jáne modeldeýge múmkindik beretin Tasqyn aqparattyq júıesin ázirleýde. Tasqyn júıesi boıynsha alǵashqy sý tasqyny boljamy aqpan aıynda jarııalanady.