1200 depýtat kásibı oqýdan ótip, tsıfrlyq basqarý salasynda daıyndaldy – Memleket basshysy
ASTANA. KAZINFORM – Memleket basshysy Qasym-Jomart Toqaev barlyq deńgeıdegi máslıhat depýtattarynyń ІІІ respýblıkalyq forýmynda sóılegen sózinde Qazaqstanda tsıfrlyq memleket qurý, ásirese máslıhattardyń róli men mindetteri týraly aıtty. Bul týraly Aqorda habarlady.
– Taǵy bir másele – tolyq tsıfrlyq memleket qurý. Bul maqsattyń elimiz úshin mańyzdylyǵyn jaqsy bilesizder. Máslıhattar bul úderisten tys qalmaýǵa tıis. Ozyq tehnologııalar men jasandy ıntellektini memlekettik basqarý júıesiniń barlyq salasyna engizý strategııalyq mańyzy bar maqsatqa aınaldy. Elimizdiń jarqyn bolashaǵy osy maqsattyń tabysty iske asýyna tikeleı baılanysty. Bul turǵydan alǵanda, máslıhattardyń osy jumysqa belsendi atsalysqany abzal. Sondaı-aq depýtattardyń kásibı biligin arttyryp, tsıfrlyq quzyretin keńeıtý óte mańyzdy, onsyz istelgen jumystyń bári bos bolmaq. Bul sharýamen Memlekettik basqarý akademııasy belsendi jáne tıimdi túrde aınalysýǵa tıis. Meniń bilýimshe, taıaý arada nátıjeler de belgili bolmaq. Búginge deıin 1200-ge jýyq depýtat arnaıy oqý kýrsyna shaqyrylyp, kásibı turǵydan shyńdaldy. Endi bıyl bastalǵan AI Governance 500 baǵdarlamasynyń aıasynda oblystyq máslıhattardyń apparat basshylaryn oqytý qajet. Jalpy, elimizde jasalyp jatqan tsıfrlyq ózgerister ortalyq pen aımaqtar arasyndaǵy alshaqtyqty meılinshe azaıtýy qajet, - dedi Prezıdent.
Eske sala keteıik, buǵan deıin Memleket basshysy Qasym-Jomart Toqaev barlyq deńgeıdegi máslıhat depýtattarynyń ІІІ respýblıkalyq forýmynda sóz sóılegenin jazǵanbyz.
