120 tonnalyq vagondardy súıregen shymkenttik rekord ornatty
ShYMKENT. KAZINFORM – Alyp kúsh ıesi Artyq Dosalıev bul erligin Uly Jeńistiń 80 jyldyǵyna arnady.
Búgin Shymkent qalasynda buryn-sońdy bolmaǵan tarıhı oqıǵa boldy. 52 jastaǵy Artyq Dosalıev jalpy salmaǵy 120 tonna bolatyn bes temirjol vagonyn ornynan qozǵap, 21 metr 40 santımetr qashyqtyqqa súıredi. Erekshe ótken synaqqa ondaǵan kórermen kýá boldy. Al Qazaqstan rekordtar kitabynyń ókilderi bul kórsetkishti resmı túrde tirkedi.
Rekord tirkelmes buryn sarapshylar barlyq tehnıkalyq parametrlerdi muqııat tekserip shyqty – relsterdiń kólemi, naqty salmaǵy men ólshengen qashyqtyq arnaıy qurylǵylarmen rastaldy.
— Relster – kóldeneń, qashyqtyq rýletkamen ólshendi, salmaq tolyqtaı rastaldy. Munda bolǵandardyń bári – oqıǵanyń kýágeri boldy. Bul – taza rekord. Qazaqstanda mundaı jaǵdaı buryn-sońdy tirkelmegen. Bul álemdik jetistik dep sanala ma? Ázirge aıtý erte – halyqaralyq analogtarmen salystyrý qajet, — dedi Qazaqstan rekordtar kitabynyń ókili Baqytjan Tastúlekov.
Artyq Dosalıev bul kúnge deıin birneshe aı boıy tynymsyz jattyǵyp, qatań tártippen jáne myqty daıyndyqpen kelgenin atap ótti. Óz rekordyn ol Jeńistiń 80 jyldyǵyna, qaharman ata-babalarymyzǵa jáne el táýelsizdigi jolynda janyn qıǵan jandarǵa arnady.
— Bul meniń sońǵy rekordym emes. Kelesi jyly Jeńis kúnine oraı 6, 10 — tipti, 20 vagon tartýdy josparlap otyrmyn. Sonymen qatar Boeing ushaǵyn qozǵaý, Aqtaýǵa baryp, tanker tartý – bolashaqtaǵy maqsattarymnyń biri, — dedi sportshy.
Artyq Dosalıev – kúsh sporty áleminde esimi keń tanylǵan tulǵa. Ol – paýerlıftıngten sport sheberi, bes dúrkin álem chempıony, eki márte Eýropa chempıony jáne Azııa chempıonattarynyń segiz márte júldegeri.
Aıta keteıik, budan buryn Aleksandr Shevchenko Rım masters týrnırin jeńispen bastaǵanyn jazǵan bolatynbyz.