120 mln teńgelik órt sóndirgish dron áli synaqtan ótip bolǵan joq — TJM
ASTANA. KAZINFORM — TJM Órtke qarsy qyzmet komıteti tóraǵasynyń orynbasary Qanat Dospaev bıik ǵımarattardaǵy órtti sóndirýge arnalǵan 120 mln teńgelik drondar satyp alý protsesi nege toqtap turǵanyn aıtty.
Byltyr qarasha aıyndaǵy Úkimet otyrysynda mınıstr Shyńǵys Árinov ár danasynyń quny 120 mln teńge bolatyn órt sóndirgish drondar satyp alatyndaryn aıtqan edi.
— Onyń qandaı ereksheligi bar? 150 metrge deıingi bıikke kóterilip, órt sóndire alady. Bizde bar órt sóndiretin kóliktiń kez kelgeninen jalǵanyp, qansha ýaqyt qajet bolsa, sonsha merzim boıy órt sóndirý jumystaryn atqara alady, — degen edi mınıstr.
Astanada ótken baspasóz máslıhatynda Órtke qarsy qyzmet komıtetiniń ókilderi osy joba qazir qandaı satyda ekenin aıtty.
— Ol dron qazir Astana qalasynda synaqtan ótip jatyr. ıAǵnı, ázirge bir danasyn ǵana aldyq. Mysaly, keshe ǵana Abu Dhabi Plaza kesheninde oqý-jattyǵý jıynyn ótkizgende osy drondy paıdalandyq. Ol apparat záýlim ǵımarattardyń qasbetindegi jáne balkondardaǵy órtti sóndirýde aıtarlyqtaı tıimdi ekenin kórsetti deýge bolady. Bul tájirıbeni áli de pysyqtap, baqylaımyz. Shynymen tıimdi ekenin kórsetse, jappaı satyp alý týraly sheshim qabyldaımyz, — dedi Qanat Dospaev.
Al Órtke qarsy qyzmet komıtetiniń bas mamany Eldos Zııada mınıstrlik óz jumysynda pılotsyz ushatyn apparattardy jıi qoldanatynyn aıtady.
— Qazirgi tańda mınıstrlik balansynda 160-tan astam dron bar. Ol drondar kóbinese órtti erte anyqtaýǵa paıdalanylady. Áýeden monıtorıng jasaýǵa da jıi qoldanamyz. Mamandanǵan ortalyqta arnaıy drondar bar. Ol ózi túsirgen beıneni onlaın rejımde ortalyqqa jiberip otyrady. Árbir orman alqaptarynyń qasynda Tótenshe jaǵdaılar mınıstrliginiń qosymsha kúshteri jumyldyrylǵan. Árbir órt sóndirgish kóliktiń qasynda bir dron bar. Olar órtti erte anyqtap qana qoımaı, jalynnyń betalysyn anyqtap dál baqylaýǵa da qolaıly, — deıdi Eldos Zııada.
Aıta ketý kerek, Shyńǵys Árinov bul drondar Astanada synaqtan ótkennen keıin Almatyǵa da satyp alynatynyn málim etken.